October 10, 2023 || Tongsan Media Group ||
Myanmar – India gamgi, India gam Mizoram State ah tukha October 7-9, 2023 kikal ni thum sung tengin Myanmar gam pan akipuato Kun gah akeu ip 1500 val India sum (Rs. Teng 700) kimman Kawlgam sum (MMK -Teng 24,500) man Assam Rifles leh Custom Department te kipawlin man uh ci hi.
October 9 ni in Champhai District, Chhungte leh Zotlang khua kikal ah Myanmar gam lam pan vankham akipua Kun gah ip (971) kimatsak in, October 8 ni-in zong Chhungte khua kiangah ip (249) kimatsak leuleu hi. Hih ninih sung akiman Kun gah man vekpi gawm (Rs. Teng 600 (MMK. Teng 21,000) man ding ci-in Mizoram News in October 9, 2023 ni-in pulak hi.
October 7, ni in zong Kolosip leh Bairabi kikal ah Vanpua Mawtawpi 3 tawh kipua India sum Rs. Teng 95 (MMK. Teng 300) val man Kun gah keu ip 299 pen Assam Rifles ten mat uh hi. Myanmar gamah SAC in ukna a buluh khit Myanmar gam lam pan India gamah Kun gah kipuakna tawh kisai India kumpi in, ngattak khakcip uh hi. Nidang hunin Kun gah kipuate hih zah liangin, kimanlo a, Ukna buluhte khit akipan kilimmat mahmah hi ci-in, a min gennuamlo Mawtaw hawl khatin gen hi.
” Nidang hunin akikham vante sel bawlin kipua thei lel ee. Kun gah man kiam luatna hangin kisem nawnlo cih hizaw kha thei maw! Tukha sung bel khauh pha diakin kiman pahpah mawk mah veh aw! Man kha vanglak leh lah kingah kik nawn vetlo! Akiman kha vante peuh mah mei tawh haltum pah lian uh ” October 7 ni-in zong Mizoram State, Champhai District, Zokhawthar leh Melbuk khua kikal ah vankham kipua Rs. Teng 26 val (MMK. Teng 900) valman Zatep (Cigarettes) Thohpi 17, Beer Thoh 16, Wisky cihte Assam Rifiles galkapten man uh hi.
Abeisa October 3, 4, niin zong Mizoram State ah Myanmar gammi pasal khat leh numei khat khamtheih zatang tawh India thuneite’n man uh hi. India gam Mizoram State ah Myanmar gam pan galtai a om vekpi gawm 50000 val om ta uh cih thu Chin Human Right Organization pawlten gen uh hi.
Source: RFA News
Translated: Tongsan Admin Team
Hits: 5