Kachin Independent Army (KIA) te leh akipawlpih PDFs te’n Kachin State sung a om khuapi khempeuh phial buluak / lakhia khin ta uh a, Khuapi lian nihna ahi BaHmaw khuapi zong December 4, 2024 ni-in SAC te tawh kikap /kidona kipanta uh cih Kachin gal lam vaisaite’n gen uh hi.
Bahmaw khuapi sung a om SAC galphualte leh Mansi khuapi sung a om SAC galphual a om laite KIA leh a belpawlte in thakhat thu-in sim huan uh a, Bahmaw khuapi mun pawl khat lakhia khin zo ahihna pulakna nei uh hi. Tuni December 4, nitak lam ciangciang thu kizakna ah Bahmaw khuapi lakna / kidona pen nasia mahmah a, SAC lamte’n zong a khahsuah ding ut hetlo ahih manin, nasiatak dal / nungkik nailo phot uh ci hi.
Hih Bahmaw khuapi lakna kidona tawh kisai December 4, ni akipan hi a, Bahmaw – Mansi khuapi kikal sung teng a om SAC galphual khempeuh KIA leh akipawlpih PDFs te’n nasiatak do uh a, SAC Camp mun 7 lakhiazo ta uh ci hi. SAC lam pan zong Khua pua lam mun pawl khat Thaupi tawh a kapna hangin, khuami tampi in sihlawh cih thu Bahmaw khuami khatin gen hi. Tua hi a, kikapna ni 2 sung bekbek ah khuami 10 kim bang sikhin ta ci hi.
Hih Bahmaw khuapi kidona pen nasiat mahmah laitak hi a, Ukna buluh (SAC) lamte gal huh ding kisam mahmah ahihna leh gal kidona pen kiciantak kigenthei nailo hi cih thu KIA thukan khatin gen hi. Tua banah SAC lamte in Vanlam pan gal huh dingin kigingsa in om uh cih zong KIA thuneite’n genbeh hi.
Kachin State sung gal kidona vai tawh kisai gamvai thumu khat ahi U Zaw San in a genna ah, gal kidona pen nasia semsem kha ding hi. A diakdiak in ukna buluh (SAC)te in van lam pan kap dingin kilimgin mahmah uh cih thu genkhia hi. Bamaw khuapi leh Mansi khuapi kidona vai tawh kisai-in KIA thugenpi ahi Major Nawbo kiangah thudotna kinei laitak ahi hi.
Bamaw khuapi sung a om No.(21) Military Infantry 47, leh 23 No. 933 SACte’ galphualte nungthuap galvan puak galkap, No 11 galkap Siavuante, No 5. kizopna galsimte, No 366 thaupi lente, leh No 314 thaupi lente, No 7006 galdalna lam galsimte, No 5014 thaupi mawtawte, No 914 galkap lam bute, No 944 galkap inn lamte, leh galsimna Security cihte om uh ci hi.
Bahmaw khuapi sungah SAC galkap vekpi 2500 bang om ding cih galsimna lam thukante gen uh hi. A beisa 2024 June kha sungin Bahmaw khuapi a om SAC te’ galphual pawl khat KIA leh a belpawlte in sim ngei khin uh ahih manin, gal vai tawh kisai ah khuamite kigin tawntung ding kisam mahmah ahihna KIA thuneite in genkhia hi. Tulaitak pen Bahmaw khuapi ah gal kidona nasiatak a om banah a kiang a om Momauk khuapi zong KIA te in ukcipzo phot uh ci hi.
Hits: 5