Karen National Union (KNU), Bilin Township, Thaton District, Brigade (1), Meapali khuaneu a om SAC Camp kikapna pan gallel a taimang SAC galkap 19 te kihingmat kik ta ci-in KNU pawlin February 7, ni-in pulakkhia uh hi. Hih Maepali Camp pen nidang hun lai akipan Ukna buluh (SAC) galkapte’ phualpi thupi mahmah khat hi a, abeisa February 1, 2025 ni-in KNLA te’ makaih Revolutionary kipawl khawmte’n do uh a, tawmvei sungin lakhiazo ziau uh bek tham loin, SAC galkapte honpi khat leh galvan pawl khat ngah khia uh hi.
Tua Meapali Camp pan gallel in a taikhia SAC galkap honpi khatte’ sung pan 19 kihingmat kik ahih manin, akiman vekpi gawm 48 phata ci-in Du Thaton District, President Padu Soe Myint in gen hi. Tua banah Galvan kingah khiate ahih leh Howitzers thaupi akihel Thaupi thauneu kigawm vekpi mal (54) leh thautang tampi kingahbeh cih thu KNU thuneiten gen uh hi.
Hih Meapali Camp kikapna ah SAC galkap lamte Major 1, Captain 1, akihel vekpi gawm 29 si uh a, Captain 1, akihel galkap 29 mah kihingmat cih thukician hiphot hi. Ahi zongin, a taimangte’ sungah Strategic Commander Colonel Thet Lwin Oo (No. 8 Operation Command ) leh Battalion Commander Colonel Sai Thurahtay (No. 405 Infantry Battalion, Lieutenant)te pen a site lakah kihel / kihello cih kician nailo cih thu KNU Central pan pulakkhia uh hi.
Hits: 2