Kawlgam sung Mandalay, Sagaing Division, Magwe Division, Shan State, Rakhine State, Bago Division leh Nyipyitaw khuapi tengah tuni March 28, 2025 sun laitak (12:50) hunin 7.7 Magtitude tha tawh Zinlinna hangin, Inn leh building tampi kicim/ kizancip in, mi tampi si cih Ukna buluh (SAC) thuneite’ thukin tangkona nei uh hi. Zinlinna tawh kisai in, Mandalay zinlinna Station pan nitumna leilu lam Km. 21, kim gamlatna leinuai Km.10 a thuk bulphuh in, zinlng cih kithei khia hi.
Hih Zinlinna phualpi ahi Sagaing khuapi pan akim apam Mandalay, Amara purah, Pyin Oo Lwin, Kyautse, Magwe, Yangon, Bago, Taungngo, Patein, Wandwin, Shan state (Southern) lam Aungban, Muse, Panthazah, Momeih, Kalaymyo, Yinmabin, Monywa, Watlet, Taunggyi, Innlay khuapi cihte ah nasiatak ling ahih manin, mihing a 100 asim si in, a 100 a sim liam banah inn le lo kicim in, buddist pagoda leh Christian biakinn cihte tampi kisia ci hi.
Bago Division, Taungngo khuapi leh Mandalay khuapite ah mi 20 val si uh a, Mandalay khuapi a om Muslim Shwephone Shein bali kicipna hangin Muslim mi 20 val mah si cih kiza hi. A si aliamte leh Inn kicim nuai ah a awk cipte Ukna buluh (SAC) hotkhiatna nasepte in honkhia in, omna ding neilote vaihhawm sak dingin hanciam uh ci hi. Kizopna Internet / Phone lines te kisiacip banah adiakdiak in Nyipyitaw leh Mandalay khuapi a om Ukna buluh SAC galkap ulian General te’ Office te zong kicimzan ci hi.
Kawlgam sungah a minthang pawl khat ahi Mandalay leh Sagaing khuapi kizopna Irrawaddy Gunpi kantanna Sagaing Gunlei 2 lakah a lui zaw pen kicim / kitanzan hi. Tua banah Mandalay khuapi sung a om The SAC military council’s central headquarters omna Mandalay Palace Wall zong mun pawl khat kicimzan hi. Mandalay a minthang mahmah U Bein Bridge zong kicimzan cih kiza hi.
Mandalay International airport zong kisia gawpin a si aliam zong om ci hi. A diakin Nyipyidaw International Airport a om vanleng etcikna tausang (Control Tower) zong kicim in, tua dawn ah nasemte Vanleng lam pilna nei mi 40 val si uh cih SAC galkap ulian khatin gen cih kiza hi.
Tua banah Thailand, Bangkok khuapi zongah zinlinna hangin Dawl 30 a sang Building kilamsan laitak khat kicim zan in, nasem Thai mite leh Kawlgam mi akigawm 50 val awkcip in, 7 suakta uh cih Today News in genkhia hi. A taktak ah hih building sungah nasem 80 val om hi cih Manager in gen a, tua sung pan 2 si in, honkhia pawlte in luang 1 bek lakhiazo pan uh ci hi. Hih Building pen Thai kumpi sum sazian sitna zum Innpi (State Audit Office) dingin akilamthak hi-in, Baht sum Awn 2136 bei-in kilam hi a, akizo dek mahmah a Dawl tung nung pen bekin asam ci hi.
Hits: 7