Leitungbup Roman Catholic thuzui mi 1.4 billion valte’ a makaih dingin USA gammi Cardinal Robert Francis Provost (Kum 69), in “Pope Leo XIV” min thak tawh tuni May 8, 2025 (6:10pm) Europe hunin a (267) na Pope thak panmun ngah taktak ahih manin, Vatican city, St. Peter Basilica Square mipi mai ah kilahkhiatna, thugenna leh thupha piakna nei pah hi.
Hih Pope thak kiteelna pen Cardinal 133 in Nipi kaalkhat sung phial teelna nei uh hi a, May 7, 2025 ni-in Pope kitelkhia zolo cih lahna in Vatican city, Sistine Chapel inn khum tungah Meikhu vom kipusuaksak hi. Tuni May 8, 2025 ni petpet ciangin Vatican hun nitak (6:00) pawlin Vatican city, Sistine Chapel Inn khum tung pan meikhu kaang kikhahkhia thei ahih manin, Pope thak kiteelkhiazo taktak ta cih lahkhiatna ahi hi.
Hih Pope thak liklek Pope Robert Leo XIV, kiteelna ah Cardinal 132 in a teel uh hi-in, seh thum suah sehnih (2/3) in a zawh ciang bekin, Pope thak kiteelthei bek ahi hi. Pope thak akilahkhiat ma khempeuh mipite’n thei nuam lua uh ahih manin, ninih sung vilvel ni thapai ta in, St. Peter Basilica Square ah ngak zihziah uh hi. St. Peter’s Basilica Squarer Innpi Kong khakpi pan mipi tungah maitang kilahkhiatna nei in, Latin pau tawh “Habemus Papam! – Pope thak neita hang ei!” ci-in, Thugenna tom leh thupha piakna nei hi.
Pope ii min taktak pen Cardinal Robert Francis Prevost kici in Chicago, Illinois, USA ah piang ahi hi. USA gammi Pope ngah masa pen zong hipah hi. Pope a ngah phetin ama min lui kilaih pahin Pope Leo XIV tawh kikipsak hi. Pope Leo XIV pen American gam kiphuhkhiat zawh Pope suak masa penpen ahi hi.
Hits: 5