October 13, 2023 || Tongsan Media Group ||
Sagaing Region, Tanse township sung a om Pong Ga Dong luipi tui khan luatna hangin Tanse – Kyun Hla kikal Mawtaw lampi tunga om Lei (bridge) tui-in tui-in tai / paipih mang ahih manin, khuamite 30000 valte’n kikawmna leh khualzin gamvakna cimawh mahmah uh cih kiza hi.
October 12, nitak lamin tatsat loin guahzu ahih manin, Pong Ga Dong luipi tung a om Lei (bridge) khuapi 3 leh sualphah singte tui-in taimang a, Tanse township leilu lam a om khuanote kikawmna haksa uh cih thu Lei vai sai khatin gen hi.
” Hih Leipi pen tui khan hun simin kisia denin, kumpi huhna om loin, ko khuamite hanciamna tawh puah zel hi ung. Tukum sungin Concret khuam leh Sing khauhte zangin ka bawl beh uh hi-in, tu-in khuampi 3 tui-in hong lakkhiat sak hita! Tui a kiam mateng bel hih Leipi a zang / a zui khuaneu teng belin kizangthei nawnlo suak ve” ci-in Lei vaisai thunei khatin gen hi.
Lui khuampite leh sualphahte banah Lei nawl a lampi ciang dong tui-in netum mangin, taimang ahih manin 50 % kim kisiacip banah supna om hi. Lei puah kikna ding sum leh pai haksatna om zel banah lui tui kiam ciangin, ko leh ko tha mah tawh puahkik kul zel ding ci-in genbeh hi.
Hih Leipi siatna hangin, Tanse khua – Kyun Hla mawtaw lampi tung a om Padi, Sitha, Nanyw Taw, Kan Phyu, Wat Thu, Tha Gaung Gyi, Aung Thayar, Than Gone Gyi, Phe Chaung, Aung Swa, khua teng in kikawmna, kizopna leh van puaknate kidin khawl phot cih kiza hi.
Tua banah October 12, ni mahin Sagaing Region sung mah ahi Kani khuapi zongah guah tam luatna hangin, Lui tui khangin memcim a, inn pawl khat tui-in paipih ahih manin inn neite huhna kisam mahmah uh cih tual sung miten gen hi. ” Mencim in lampi zong kisia gawp hi. A diakin Kani khua sung Veng (3) leh No. 1, veng ah Lampite naksiat mahmah in, Inn pawl khat zong tui-in taimang a, huhna kisam mahmah uh ci-in khua sung mi khatin genbeh hi.
Tua mah bangin Mandalay khuapi sung zongah tuni October 13, 2023 ni zingsang lam (03:00am) hun pawlin guah tam luatna hangin 62 Street, 35 Street, Teihpan Street, 84 Street, 73 Street, 78 Street, leh Manawhari Road cihte tui in tum mang ci-in, Diamond Plaza kiang a teng khatin genkhia hi. Aungmi Thasan, Chanmih Thashi, Maha Aungme, Aye Chan Thasan leh Pyigyi Thakhun township a Veng pawl khat zongah tui lut cih kiza hi.
Hits: 4