Malaysia gam Selangor State, Sunway Mantari kok sungah tukha May 22, 2025 zankim (11:00Pm) hun pawlin Malaysia Immigration te’n mi sitna (operasi) nasiatak nei uh hi. Passport leh UN Card akipan Malaysia om theihna laidal neilo gamdang mi 597 man uh a, tuate’ sungah Myanmar gammi Chin State pan Zomi 100 val kihel cih kiza hi.
Gamdang mi kimante pen Myanmar gammi 226, Indonesia gammi 201, Bangladesh gammi 71, Pakistan gammi 46, Nepal gammi 44, India gammi 8, leh Thai gammi 1, cih teng kihel uh cih thu Malaysia Immigration Department te’n May 23, 2025 ni-in pulakkhia uh hi.
Malaysia a om Chin mi khatin a genna ah, ” Akiman Myanmar gammite’ sungah mi 100 valte pen Zomite bekbek hi ci-in gen hi. Tua banah akimante pen UNHCR a siaute pen UN zumte’n ahi a, amau kizoppih Committee pan akihuh theih nak leh kikhah kik thei lel in um ing. UNHCR lah siauhna neilo, bang mahmah laidal cihte nangawn a neilote bel mancip suak ding maw (or) Myanmar gam kipuaksuak ding cih kigenthei nailo hi” ci-in gen hi.
Tutung a kimante pen abeisa lai danin kikhahkhia kik ziau cih dan om mello ahih manin, Zomi Community makai te’n, zanhak liangin huh leh buaipih uh a, a damlote leh pitek /putek pawlkhat bel honkhia thei uh ci hi. Ahi zongin pawl khat UN Card tawisa pawl khat nangawn kihonkhiazo nai tuanlo cih kiza hi.
UN Card neilo, Passport lah a neilote bel tuni ciangciang lakkhiat theih nading lampi om thei nailo ci hi. A kilakhia thei dingte nangawn mi khat RM 15,000 tawh kitankhia thei ding ci ahih manin, gambeel mi khat ading haksa mahmah ding cih thu Zomi Community makai khatin gen ci hi.
Hits: 6