Iran gamah Islamic biakna tawh kimakaih Kumpi deihlohna hangin, gambup lungphona tungtang ah gam mipi 5,000 valin a sih lawhna hang leh Nuclear a bawl sawm teiteina hangin, US President Donald Trump in nuai sawm ta ahih manin, America vanleng pua Tembawpi USS Abraham Lincoln le tui galkap (US Navy Army)te Iran gam zuanin sawl khia ta ahihna January 23 ni-in President Trump in vau-na thu genkhia hi.
Switzerland gam Davos khuapi a kinei World Economic Forum khawmpi pan a ciah kik ciangin, President Trump in, ” US tui galkapte Middle East lam manawh in paisak ta ing! Ahi zongin zat khiat loh lam-en ing” ci-in thuthak saite tung gen hi. Iran kumpi in lungkimlohna / lungphona nei mipite a thahna manlang thei penin a khawlsanna ding leh Nuclear bawlna a tawpsan dingin a lung himawhna thu khauhtak pulakkhia hi.
American Kumpi thunei uliante genna ah, Asia-Pacific gam kuam lamah a kuankhia US tui galkap (US Navy) te in vanleng pua tembawpi le deihna mun peuh ah a kisawlkhia ziauziau thei Thaupi namte a pua Tembawpite zong kihel hi ci-in gen uh hi. Hih galvanleng pua Tembawpite pen hun tomno sungin nisuahna laizang (Middle East) lam (Arab minamte a tamzaw omna) hong tung ding uh, ci hi. Tua banah van lam gal-dalnate zong koih beh ding ngaihsutna om, ci-in gen beh hi.
Hits: 1