India – Kawlgam gamgi dung mipite’ a lut theih ziauziau lohna ding ngimna tawh huang umna kulhpi bawlin suaktatak a kizopna Free Movement Regime (FMR) khak cip ding cih India kumpi khensatna pen Mizoram khangno kipawlna phualpi (Central Young Mizo Association -CYMA) in nasia takin nialna bawl uh hi.
January 27, 2026 ni-in New Delhi khuapi ah CYMA makaite in India Home Secretary tawh kimuhna nei uh a, tua lai-ah CYMA makaite in a lungkimlohna thute pulakkhia uh ci hi. Tua kimuhkhopna ah thukhensatna pen gamnih (India- Myanmar) a om u-le-nau kizopna le unau laizom sikhat sakhat (pumkhat) hihna nasia takin sukha leh kikhenthang sak ding hi ci-in gencianna leh nialna uh hi.
India kumpi in abeisa 2024 February kha in Home Minister Amit Shah tungtawn a, India le Myanmar kikal gamgi 1,643 km (tai 1,000 phial) asau sung teng khakcip /umcip ding leh abeisa 1970 kum pan akizang zangsa ahi tai 10 val sung Visa kisamlo a kikawm, kizop theihna Free Movement Regime (FMR)pen hepkhiat dingin tangkona kinei khin ahi hi.
India kumpite lam pan a genna ah abeisa 2021 kum akipan Kawlgam buaina hangin Kawlgam mite Mizoram sungah a lomlom in lut bek tham loin, khamtheih guihtheih tawh sum bawl, sumzuaknate khempeuh khaktanna ding ngimna hi, ci hi. CYMA lamte in a nialna a hang bulpi pen Bangladesh gamgi akikhakcip / dai umna akineih lai-in Mizoram gam leitang mun le mual tampi kimansuah bek tham loin, Mizogam khua tampi tak huang pua lam tung mang ahihna thute gentehna a neih kawm un, tutung a sep ding geelna zong a sanzawh lohna thute khuahtak pulakna nei thei uh ci hi.
Mizoram State Assembly in zong hih gamgi dai umna / khaktanna kibawl ding khensatna pen kilungtuak takin nialna nei khawm thei uh ci hi. Tua hi a, tulaitak gamgi lampi bawl pawl (Border Road Organization -BRO) in a mun leh phual sik ngiat in kancianna (Research) bawl hi mah leh khuasung mite nialna khauhpai ahih manin kinawk tuahna a nasia mahmah laitak ci hi. Mizoram a om i sanggam Mizo / Zosuante in bel Myanmar gam Chin State sunga om Chin- Laimi, Zomite hong it, hong angvan mahmah uh cih kimuthei hi.
Hits: 2