Chin state, Tedim township Thangkai kual ah Beng (opium) nasem khangno 200 valte PDF Zoland in February kha kipat lamin man uh a, amau ciangtanna tawh a kituakte mipi galkap thak dingin guan sawm uh cih kiza hi. Zomi Federal Union (ZFU) in February 8 ni a tangkona-ah kum 18 pan 35 kikal a cidam mi le innkuan sung vaipuak nei lote galdo thei dingin gal siamna sinsak ding, cih pulakna nei uh hi.
February 5 ni pan Thangmual kuam (Thangkai kual) teng a Beng (opium) cinna ah nasemte bantang mat uh a, tuate sungah a kihel naupai nupite le pawlkhat khah khia kik uh hi. Ahi zongin pasal thacing 190 val kem lai uh, ci hi. Tualsung mite genna-ah, a suakta pawlkhat pumpi tungah satna leh vuakna liam ma om cih kigen mah leh PDF Zoland in hih thu manlo hi ci-in nial uh ci hi.
Hih vai tawh kisai PDF Zoland Thuneite’n a genna ah guitheih khamtheih ahi Beng (Opium) cinna abei siang nading lunggulhna tawh khalhna leh matna a om zelzel hangin, tuni ciang dong Beng lo suksiatna, vatmaina cihte om ngei nai lo hi, ci-in gen uh hi. Revolution hun hong sawt tohtoh ciangin, Thau tawi pawl khat leh khat kikal ah galkap kitangsapna tawh kizui-in Beng cinna nasemte mat leh henna pen ‘Thudik hilo, Pai zia man hi lo’ ci-in tualsung mite in mawhpaih uh hi.
United Nations Office on Drugs and Crime (UNODC) 2025 a kancianna pan thupulakna ah Chin state sungah Beng (opium) cinna pen 26% (za lakah sawmnih leh guk) khangto, ci hi. Gal le sa hang leh sum leh pai haksatna hangin tualsung mite in, nuntak khuasakna haksa semsem ahih manin, sum ngahna ol / baih pen ahih manin, Mipite’n Beng (Opium) nasepna lunglut uh ahi hi. Hih bang nasepna pen Khristiante’ sep ding hilo banah Pasian deihloh nasepna taktak hi cih thu Pasian nasemte leh thu um mite’n a lunghimawhna uh pulak ta uh hi.
Hits: 3