July 27, 2023 || Tongsan Media Group ||
Nasepna/Kipawlna khatpeuh ah Makai-Nungzui cihte, Tungsiah-Nuaisiah cihte lem sa nawnlo-in Nasem khawmte (Colleagueship) cih lungsim akhan ding i deih leh i vom ding vaipi nih A&B:
A. Ei’ Mimal khat ciat’ Hanciam Ding Thu mal 10
(1) I vaipuak thupi-ngaihsut ding (Lk.9:26; Phi.3:14)
- Ahih theih lai teng vaikuan pelhlo ding
- Hun maan ding (nat le dam kitelsak ding)
(2) I vaipuak theitel ding (Job description)
(3) Nasep siam sawm ding (Prov.22:29; 2Tim.2:15)
- I kihelna phual-a sepzia paizia theitel ding. (Gtn. thukhun, thumeilet, meeting, report, information)
- I vaipuak nam tawh kisai vanzatte zatsiam ding (Gtn. Mawtaw, computer, internet, stationery, machinery, accountancy, language, cihte…)
(4) Ei’ sep ding khat midang khiatlo ding, kuamah “ngian vat” lo ding (avoid buck-passing, shifting, or artful dodge)
(5) I sep khat peuhpeuh, sepkhialh a om leh zong mawhpuak la ngam ding (accountability)
(6) Sepkhialh i neih leh i siam nailoh man hizaw henla i polhteh i zulhtat man hilo hamtang ding (sincere mistake)
(7) Sepkhialh nei-a taai / thuhilh i thuak leh zong siam semsem na dingin la ding.
(8) I kihelna phual’ ading i sep laitak ei’ aituam vai khatpeuh i van manleh thukhat, ei’ aituam vai khat sep nadingin kipawlna min paulap ngeilo ding.
(9) Pasian’ na a semin kingaihsun in deihsakna leh lawpna tawh a hoihpen in sem ding(Col.3:23)
(10) I thahatna mun pen lian mah i thanemna lianpen suak thei cih phawk gige ding.
B. Seppihte tawh Kizopna ah Phawk den ding thumal 10
(1) Vaipuak a bul lam a lente zahtak piak siam ding; vaipuak a dawn lam a lente neubawl kha lo ding.
(2) Kitaai, kihap, kitawng, kilaai, kivua cihte zang peuhmah lo ding (not to be like gangsters or money-first businesses)
(3) Naseppih a citak a hanciamte a manphatna tel ding; i muanna lak ding.
(4) Naseppihte a kua ci lo, phat-huaite phat ding, pahtawina kam gen ding.
- Hong panpih milian mihau khatpeuh mai-etnop luatna huhau-in i gei-a cihtakna tawh na a sem cintente a pampaih kha i hihloh ding thupi hi.
(5) I lawmte i hawmthawh simin amau’ haksatna theihpih sawm ding.
(6) Panmun bul lamte’ vaihawmnate hoih i sak loh om phial taleh ahih theih lai teng man sawm ding.
(7) A hoihzaw ding i theih leh a bul lamte’ kiangah thudam tawh gen ding.
(8) I gen thu hong kithudon kei leh paukhial tuan lo-in gen kik theih hun khat ngak ding
(9) Panmun a bul lam a lenkha i hihleh a hoihzaw ding hong kipulakte thupi-lakin ngaihsunkak ding.
(10) Thu hong kuppih thei zelte hong pau nawnkei uh leh ka thu hong kimang cikha loin thuhoih hi nawnlo cih phawk ding.
Rev. Pau Lian Mang, D.Theol.
Hits: 10