October 6, 2023 || Tongsan Media Group ||

Leitung mihingte pen upna, lametna, maban cihte kinei ciat bek tham loin lungkiatna, nungtolh theihna, maibinna tuamtuam cihte a kinei ciat ahi hi. Tua sungah kei zong mihing khat ka hi hi. Myanmar gamah khangkhia khat ka hihna tawh kizui-in University kah ding maban nei kimlaipi mahin 2008 kum ciangin, ka mailam nuntak nading leh tua hunin ka haksatna thu tuamtuam hangin Myanmar gam panin gamdang paikhiat ding ka khensat hi. Ka neu lai-in United States of America (USA) tungte pen minthang vangvang bek tham loin, a innkuanpih, a u a nau uh huh zo mahmah uh ahih manin, tuate pen en cihtak mahin ki-eng ngeungau hi.

Tua hi in, abeisa 2008 June kha ciangin gamdang pai ding ka khensat a, USA tun baih theihpen nading cih ngaihsutna tawh Thailand ah ka pai hi. Thailand ah kum 4 sung omin lamet a bat loh ciangin Malaysia ah sum zong (thalawh) dingin 2012 kum ciangin Thailand pan Malaysia ka pai phei hi. Tua ahih manin “KA KHUALZINNA MALAYSIA,” cih thulu tawh ka muh, ka sinkhak, ka tuah thute tom thei penin kong hawmsawn nuam hi.

Malaysia ka pai ma-in biakna pawlpi kician nei ding, khua kipawlna lut hamtang ding, community zum tawh hoihtak kizom ding cihte email tungtawn in lai tawh ka simzel hi. Tua mah bangin Malaysia ka tun ciangin zong tuateng mah kin masakin ka nei pah hi. Malaysia ka tun ciangin Nipi ni (Sunday) nasep a khawlsakna munte bek ah sem ning cih bang ka ngaihsun a, ahi zongin tuadan nasep ngah pak nading na baih hetlo mawk hi. Tua ahih manin muh masak sep masak hipah ding ci-in ka ngaihsun a, ansai khat ah kuangsil ding mi kisam ci ahih manin Malaysia ka tun khit ni nga a cin ciangin ansai ah kuangsil dingin ka pai a, nasep ka kipan thei hi. Nasep kipat ciangin mi nasepdan pen nasia mahmah mawk hi.

Sep cihtak sem, manlang theihzah a manlang, hun man setset bek hilo, lungsim khempeuh piakhia-in eimau mun tek panin bui leikui a cih mah bangin a kisem ziahziah na himawk hi. Kuangsil ka hih sam hangin kuangsil bek kisem peuhmah loin sa em, meh at huh cih bangin a kisamna peuhah ka tai kawikawi mai hi. Hun tawm zekai kha leng sum kiliau ciatciat ahih manin nasem khempeuh hun kiman setset pah hi. Hih munah Mikangte paunak khat ahi “Time is money,” a cih uh pen a manphatna ka tel sansan hi.

Tua bek hi lo, sepkhop diamdiam, kipawlkhop diamdiamna bek tawh a lemtang ahihna zong ka telmuh mahmah hi. Eimau vaipuak tek a om ahih sam hangin a kisamna peuhah kihuh kawikawi-in sepkhop diamdiamna in gualzawhna leh matutna hong pia a, an ne dinga hong pai mite a lungkimsak mahmah hi. Ei mimal vaipuak bek sem zo cih ciang hi nawn loin huh a kisamte huhna in hong mazangsak bek hi loin lungsim picinna zong hong guan toto na hi gige hi. Hih ansai ah kha khat bek na ka sem kha hi.

A masa ka sepna ansai panin nitumna lamte ii an (Western Food) kizuakna khat ah ka sem leuleu hi. Hih mun leuleu ciangin mihingte ading tha a piangsak an cih bulphuh diakin cidamna tawh a kituak ding kihanciam mahmah hi. Van zat khempeuh a siangtho sitset dingin kihahsiang den hi. Nitumna lamte in ei nisuahna lam-a omte sangin cidam ding leh siangtho ding pen a kinzaw uh ahihlam ka tel tuam mahmah hi. Ka mihau pa uh ansai nei pa bangin buhsih tam i nek khak ding hong phal pha lo hi. “Buhsih tam nek pen i pumpi bek khang a, i ngaihsutna i khuak khangsak lo hi,” ci-in hong genpih thapai hi.

Hih sai-a hong pai anne mite zong gamlum lialua-in kiimlepaam nawngkaisak cih om hetlo uh a, amau mun tekah suakta takin om hithiat-in noptuak mahmah se hi. Hih ansai panin pilna thupi mahmah a, tua pilna i ngah theih nadingin nekledawn zong a thupi mahmah ahihlam ka phawk sansan hi. Nekledawnte cidamna tawh kituakin neksiam ding thupi mahmah a, tua bek thamlo i khuak hatsak hi. Tua ahih manin pilna i deih takpi leh nekledawn zong i kin ngaihsut ding thupi mahmah hi cih hih ansai panin ka phawk thak semsem hi. Hih ansai ah ka sep kawmkawmin mawtaw puahna (car workshop) ah sem nuam ing ci-in ka lungsim sungah hong phawngden khat om hi.

Mawtaw puahna ah sem nuamlua ka hih manin hih Western Food zuakna ansai panin khawlin mawtaw puahna lam ka dawp kawikawi hi. Ka pai kawikawina ah ka phone nambat hong la zel-in “Hong thuzakik nung,” cizel sam napi’n hong kisamkik peuhmah lo hi. Tua pen 2013 kum ahi hi. Nasep lem thei paklo ka hih manin sawtpi nasem lo-a ka om ding lem lo ahih manin Sen ansai khat ah ka lut leuleu hi. Hih ansai leuleu ciangin nek ding an ahih sam hangin a melhoih, a etlawm cih thupisak diakin ka ngaihsun hi.

Nek dinga theihsa gige pen paak khawng tawh puahpuah mawk uh hi. Sa khawng a tan uh ciangin zong a etlawm theithei dingin at se uh hi. Ankuang sungah a etlawm mahmahin phah dikdiak uh a, duhhuai phadiak se hi. Siangthona lamah bel siangtho lua lo uh hi. Hih sai ah pen eimi zong nasem honkhat na om a, kitot kilaina tam mahmah hi. Tawmkhat zu kamnam pian lehang a kilai pahpah nuamte i hi sese hi. Ka lungsim tawngah na sa-in “Banghangin eimite hih zahin kitot, kilai ding ut i hi zen tam aw?,” ci-in ka ngaihsunsun mai hi.

Tua ahih leh i kitot ciang bang bulphuhin kitawng i hi hiam? ci-in keima khomin ka kan simsim mai hi. A kitawngte thu ka kankan ciangin a tungnung kituh, cih thamlopi a lianzaw kituh cihdan khawng vive na hilel hi. Bang hangin hih zahin kiliansak i hizen tam aw?, cih dotna ka lungsim ah hong suak leuleu hi. Pulepate ii a kisialna uh ahi “Nang pu sang’n kei pu lianzaw, nang pa sang’n kei pa lianzaw,” a cih kammal bang ka nung ngaihsutsut hi. Kiliansak nuam tek i hih manin i kilem ding hamsa hi.

A cih thamlopi panmun peuh kituh tantan nuam hi hang. Hih khempeuh keima khomin ka ngaihsutsut ciangin pilna i neih loh luat hang na hi gige hi. Pilna nei zawdeuh eimite bang mi khawng tawh kipumlai lualua ding cih khawng ut lua samlo uh hi. Tua ahih manin ei Zomite pen pilna a kisam pha mahmah diakte hi hang ci-in ka ngaihsun hi. Eimite a tamzaw tham bang pen khasum san khit ni nih, ni thum khawngah a zat ding sum nei nawnlo pahpah mawk hi hang. Khasum san ciangin innlam ah kikhak gai pahpah mawk hi. A zing a thai ah zattawm ding nangawn om nawnloin sum kileitawi pah phangphang zawzen hi.

Ei Zomite i hamphatna khat pen a ki-itdiakte i hihna kilang mahmah hi. Ahi zongin kikhual kholhna, kiginkholhna cihte ah kithanem mahmah zel hi. Zomi khempeuh ka cihna ahih pah samloh hangin a tamzaw tham pen kituaci lai mawk hi. I tuacihna a hang taktak pen pilna nei kitam nai hetlo ahih hang ahi hi. Tua ahih manin Zomite adingin koikoi i om zongin pilna mah i kin masak ding leh i kitangsap bulpi ahihna kilang mahmah hi. Pilna nei tam semsem, kikhenna tam semsem a kicih tei sam hangin pilna nei mi tam semsem lehang kilem semsem, kipumkhat semsemin nuamsa semsem ding hi hang cih ken a um tinten ka hi hi.

Hih ansai ah 2018 kum dong ka sem a, kum nga bang ka sem hi. Tua kawmkawm mahin ka sep nop mawtaw puahna zong ka kan kawmkawm hi. Ka lungsim ah tua bekbek hong kilolo thapai hi. Sen (Chinese) sangnaupangte zong hun-awng a neih uh ciangin parttime semin hong kuan zel uh hi. A hun uh a mawkbeisak ding a nu a pate un phal lo ahih manin hong kuan uh ahi hi. Mihau pipi, mawtaw hoih pipi tawh hong kuan zel lel uh hi. Hih Sente ii kimakaihna, kipantahnate zong etteh thamcing mahmah hi.

Hih Sen ansai ah kum nga val bang ka sep khit ciangin ka lungsim-a kilo thapai mawtaw puahna ah sem dingin ka kithawi thei ta sam hi. Ahi zongin ansai a ka khasum zah lang zong a ngah ding ka hi kei hi. Sin nop, theih nop nei ka hih manin tua sum khawng peuhmah ka thupisim zo nawn kei hi. Nasep ka kipat khit a sawt loin mawtaw pei ka thuah leh na kho loin kilometer thum zong pai nailo pi mawtaw pei kilakhia hi. Mawtaw nei pa ka nasepna ah hong pai vingveng a, hong tai ziahziah hi.

Ka mihau pa in zong hong taithuah lailai a, ka lungneu lua mahmah hi. “Hih nasep pen kei ading hi lo ahi kha tam aw,” ci-in lungkia dikdekin na sem nawn vet loin ka omna khan ah ka lumcip hi. Ka mihau pa (Boss) in zong a khawlnop leh khawl mai hen ci ahi diam hong samkik peuhmah lo hi. Zan thapai ngaihsunsun-in “Kei pen hih mawtaw puahna-a kisin nuam ka hih manin ka kipiakkhiatna tampi om khin hi, bangbang ahi phial zongin kipankik ning,” cih ka khensat giap hi. A zing ciangin nasem ding ka kipankik a, neu-etna khempeuh ka pumpuak mikmek lel hi. Tua hamsatna khempeuh sangin ka sinnop pilna in hong zo zaw ahih manin hamsa pi mahin ka hanciam tautau mai hi.

Tua leh a sawt lo khat mahin mawtaw ka puah leh ka khialkik leuleu hi. Ka mihau pa in “Na khuak pen ka tawbal zahin man nei lo hi, ka zat nading mahmah thei nawn keng,” hong ci dikdek leuleu hi. Ahih hangin hong hawlkhia samlo ahih manin ka sem tantan veve hi. Damdamin hanciam toto-in tawmkhat ka siamdeuh ciangin ka nasepna mihau pa in hong it petpet ta hi. Pahmaih hong sa ta hi. Tuazah khatin zong ka thalawh man ding zong hong tamsak zawdeuh pah a, nasep ka kipat khit kum khat bang ciangin khasum zong a kilawm khom mah ka ngah ta hi.

Tu-in ahih leh kum nga bang sem ta ka hih manin ka nasep nuamsa-in gimletawl cih zong phawk nawnlo bek hi lo, khatveivei ciangin annek ding nangawn ka mangngilh kha pahpah hi. Malaysia pen nasep khempeuh teel theihna kinei citciat hi. Hih i sepnop keileh a dang nasep kizong thei lel hi. Tua pen i hamphatna lianpi ahi hi. Malaysia panin kivakna kician khat teitei i sin ding thupi ka sa mahmah hi.

Nasep kawmkawm mahin kivaksuk, kivakto kawmkawm zel ahih manin palikte ii matle-hen zong ka tuak kha zel hi. Malaysia ah om theihna ding phalna laikung laidal bangmah nei hetlo pi ka hih manin suakta takin kikhuasa thei taktak samlo hi. Ahih hangin bangmah nei lo pi mah ki-om thei lel ahih ciangin Malaysia kumpi thuneite pen ei ading a hoih mahmah himawk hi. Zomi tampi takte gam nuam a tun theihna zong Malaysia mah panin tampi pai kha ihih manin ei ading a lungdamhuai mahmah ahi hi. Nasep silbawlna ah lawmlegualte zong a ngaihsutna uh ei sangin picing zaw-in hong khual mahmah ka sa hi. Ei gamah amau hong zin hi peuhmah leh simmawh mahmah kha ding hi hang ci-in ka ngaihsun thei zelzel hi.

Tua ahih manin Malaysia kumpite tungah lungdam koh ding leiba lianpi a nei i hi hi. Tua bek hi lo, Zomi sunga kipawlna omte in zong hong it, hong huai-in hong panpih den ahih manin amau tungah zong ka lungdamna lian mahmah hi. 2022, December kha sungin ka innlak sanggam khat in Malaysia ah hong nusia dihdih mawk hi. Tua hong nusiat ciangin a luanghawm pen nule-pa lunggulhna om bangin khualam ah puak dingin ka vaihawm uh hi. Ahi zongin hih luangphamna ah ka theihna in hong cin hetlo ahih manin Zomite sunga kipawlna khat ahi Zomi Refugee Committee (ZRC) in hong huh hong panpihin ka nau luanghawm pen nule-pa omna ahi Myanmar gamah kipuak zo hi.

Hih bang hamsatna ka tuak ciangin ka tel mahmah thu khat in “Aw, Zomite pen luang a kipham ngiatngiat, a ki-it takpite i hi zen ve maw, Zomi khatin ka pian khak hampha si ing,” ci-in ka lungkim mahmah hi. Tua ahih manin Malaysia ah hamsatna leh nopna tampi ka tuak hi. Suakta takin ki-om ahih loh bangmahin khasum kipia lo leh ngah ding zah kipia lo cih zong ka tuak kha zel hi. Tua bek hi lo nasepna khawngah hong kineubawl deuhna cihte zong ka tuak kiaukiau a, i hamsat ciangin a kihamsa takpi mah ahi hi. Nasep hun ding ciangtan zah val ka sepkhak hun zong om a, ahih hangin thaman ka ngah loh zong tampi om hi.

Ahi zongin Malaysia panin mite ii sum bawl zia mite ii nasep hahkatdan cihte ka sinkha a, ka mit mahmah tawh mu-in ka hamphat lawh hi. Malaysia pen gam nuam tun theih nading lampi khat om cih ciang bek hi peuhmah loin i ut khat, i sepnop khat peuh zong kisin thei, kisem thei a, Zomi tampi tak mah in kihamphat lawh khin hi. Zomi pawlkhatte bang Malaysia-a a nasep pen siam sitset ahih manin Myanmar gam a ciah ciangin tua tawh nuntak khuasakna bawl uh a, nuamsa mahmah uh hi.

Tulaitak mahmahin zong Zomi tampi takte pen nasep hoih, nasep kician nei-in mite ii muanlesuan-in om zihziah hi hang. Pilna, siamna, kivakna cihte kinin hileng Zomite sungah kithutuahna, kilemna omin kikhangto hanhan ding hi. I sepnop, i lungsim sunga a omngait pen zong i theihkhiat ding thupi mahmah a, tua a theikhia Malaysia a om Zomi tampitakte in khutsiam kivakna ahi zong pilna siamna tampi ngahbehin nuamsa mahmah lel uh hi. Zogam, Zomi khantoh ding i deih taktak leh ei mimal khangto leng i gam i lei a puahpuah, i minam a tawisang kihi pah lel hi.

Mi pawlkhatte ansai ah a makaipi khawngin om uh a, mehlim anlim huansiam mahmah uh hi. Pawlkhatte pen innlamna lam ahi zong, aircon puahna ah ahi zongin, meikhau zopna lam ah ahi zongin, setvan tuamtuam puahna, sumbuk vanzuakna sai tuamtuam ah thunei mahmah cih bangin mun tuamtuam ah muanlesuanin a om Zomite sungah tam mahmah ta hi. Tua kivakna tungah cihtakna, lungduaina, hanciam tintenna tawh i kop nakleh i khualzinna Malaysia panin lawhcingin nuam i sa semsem ding hi.

Thukhupna:

I khualzinna Malaysia panin pilna, siamna tampi ngahin tua pilna siamnate tawh hun khat ciangin i gam i lei gia bang zuunkhawm ve ni e ci-in kong zawn phapha hi. Ka khualzinna Malaysia pen kei adingin mun hoih, gam hoih, hamphatna tampi hong pia hi ci-in lungkim takin ka maban adingin ka hanciam teuteu lai hi.

By: Hang Khual, Malaysia

Hits: 19

Byadmin

Leave a Reply

Your email address will not be published. Required fields are marked *