Zogam (Chin State) ah Piangthak pawlpi a piankhiatna Pawlpi ahi Evangelical Baptist Church (EBC) pawlpi pen abeisa 1975 kumin piangkhia hi. Tua Piangthak Pawlpi EBC pen gambup min kivaipuakna dingin Evangelical Baptist Conference ci-in kikipsak a, Kawlgam kumpi in biakna kipawlna kician khatin a ciaptehna (Registration No. 1234) tawh kalsuan uh hi. Hih Piangthak pawlpi EBC pen tu-in kum 50 cingta EBC Golden Jubilee (1975- 2025) ahih manin, Pasian thukimpihna na om leh Febraury 20-24, 2025 sung Tedim khuapi ah thupitak kibawl ding cih kiza hi.
EBC – Myanmar pianna dingin March 5, 1975 (Wednesday) ni-a suaikai / minthuh (Signature) Siate leh upate zong “PAHTAWINA SANGPEN” kipia ding ci hi. Sia leh upa adam nawn lote’ tangin Pahtawina san sak ding a tu a tate leh tanaute pello a kihelsak hamtang ding EBC Tedim in tangkona nei uh ci hi. Pahtawina Sangpen piak hun ding pen February 23, 2025, Sunday (10:09Am), Golden Jubilee hunpi sung, Tedim EBC Biakinn ah kipia ding cih Golden Jubilee Main Committee in zaksakna nei cih thu kiza hi.
Tua banah hih EBC Golden Jubilee pawipi phawkna ” Golden Jubilee Comemorative Magazine 1975-2025″ zong thupitak kibawl khin a, akingah theihna ding munte zong a sawt loin kizasak ding cih EBC gambup makaite’ tung pan kizasawn hi. Hih EBC Golden Jubilee pawipi pen thupitak kibawlsawm ahih manin, gamsung gampua pan pawi sim ding kipaisawm mahmah cih kiza hi. Kawlgam leh Zogam khua hun siat kawmkal ah EBC Golden Jubilee nuamtak a zattheihna dingin thu-um miten thungetna ah phawk ciat ni.
Hits: 6