Chin State, Hakha khua gei aa om SAC galphual pen October 28 ni in CNA leh CDF-Hakha te kipawlkhawm in do uh a, SAC galkap (15) si in, Major khat akihel (4) kihingmat cih thu CDF-Hakha in pulak khia hi. CDF-Hakha leh CNA kipawl in Operation Rung min tawh Hakha leh Thangtlang kikal aa om SACte’ phualpi khat ahi Kiamtlang Camp pen October 28, 2024 ni-in va do in lakhia zo uh hi.
Tua galphual lakna ah Thau lawng (9) leh thauvui thautang tampi kingah khia banah MA1 te mal (5), MA 2te mal (2), MA 3te mal (3), MA mal (11) leh thautang honpi khat kingah hi ci in gen uh hi. Ukna buluh (SAC) a zung pan abei mateng do ding leh Federal Democracy gam hong pian khiatna dingin galdo pih kipawlna tuamtuamte tawh kipawl khawm in galdo suaksuak lai ding ahih manun, mipite’n naipitak thapia in panpih toto lai dingin itna tawh kong ngen uh hi ci in CDF- Hakha in gen uh hi.
Hih galphual lakna-ah CNA leh CDF-Hakha lam panin a si omlo hi ci in gen uh hi. Tua banah Chinland Council belpawl galkate in Thantlang khuapi lak zawh nading in nasiatak gal adodo lai tak uh ahi hi. SAC galkapte’n zong, Thantlang khuapi a lakkik zawhna ding hanciam mahmah uh a, vanleng tawh nasiatak a kap ziahziah banah a galkapte leh ganvan te behlap ngekngek uh ci hi.
Thantlang leh Hakha kikal a om Chinland Council te ngahsa SAC galphual pawlkhat pen SAC te in a ngah kik zong om in, Thantlang aa galkuan SAC galkapte leh galhuh ding aa pai SAC galkap te zong kigawm khawm kik thei ta uh hi mah leh Thantlang khuapi ngah kik uh cih tawh kisai pen thu lengzau hiphot ci hi.
Thantlang aa SAC galkap phualpi zong ko khut sung mah ah om lai a, amau angah kik zawhna ding hanciam in a kuankik uh hi. Ko lam pan zong nasiatak kido/ kikap ahih manin, tuni dong ngah kik zolo uh hi. Tua banah Thantlang khuapi sungah SAC galkap om kawikawi cih bang hilo in, galphual in a neih uh ahi Palik zum (Police Station) leh NLD zum bek ah a om uh ahi hi. Tua hi in nisim phialin kikapna om den hi ci in Chin thukanten gen uh hi.
Thantlang khuapi sung ah SAC te galphual mun 7 a omna sung pan mun 5 a kingah khit hang in, SAC lam pan gal vanlengte tawh galhuh puak beh den banah Vanleng tawh hong kap ngekngek uh ahih manin, galphual pawlkhat kikhahsuahkik hi ci in CDF-Hakha in gen hi. Hakha khuami khatin a genna ah, “abeisa ni 2 sung teng kikapna om himah leh Oct 29, 2024 ni akipan kikapna om nawnlo phot hi ” ci in gen hi. Tulaitak ahih leh Thantlang khuapi 90% bang Chinland council leh apawl te’ khut sungah om hita ci in, CDF- Hakha thuneite’n gen khia uh hi.
Hits: 10