Israel te in Gaza a suksiatna pen abeisa a tuah khak ngeite uh bang loin, suksia mahmah ahih manin Palestine gam mite State khatin adin theih nading a kuamah ciatin deihsakna neih huai cih UN General Secretary António Guterresthu genkhia hi. Afraica gam Kampala khuapi akibawl a (19) veina Non-Aligned Movement makaite khawmpi pan Antonio Guterres in Israel leh Palestine ading langnih thusian sak ding tawh kisai thukimna om zawhlohna leh Palestine mipite a dingin gam thak phut theihna ding vai akisan zawhlohna hang ahihna genkhia hi.
“Hih Gaza buaina pen leitung bup daihna leh lungmuanna a om theihna ding lauhphawnna leh vauna a piang sak thei buaina bulpi hi” ci-in UN Secretary in gen hi. Tua banah a mahin a genbehna ah “Hih khawmpi pen kitelkhialhna nasiatak apiang thei, mihing pianpih hamphatna (Human rights)te thupisan theih hamtang ding, leitung bup tawh kisai thukhun (Geneva Convention) leh UN thulet guipi (UN Charter) cihte tungah gawtna leh mawhsiatna om hi. Kido kikapnate khawlsan nading leh mat leh hen thuakte akipan mawhsakna tuak khempeuh paulap om loin, akikhah khiat ding mapang ding hing” ci-in genbeh hi.
“Tua banah Gaza suksiatna sung tomno sungah UN nasem mi 152 in a sih lawh banah Palsetine gammi tampi takin mulkim huai takin nuntak a bei lawhna pen kei panmun let hun sungin ka tuah khak ngei loh thu hi” ci-in UN General Secretary in genkhia hi. Hamas migilote in Gaza kuam pen abeisa October 7, 2023 ni-in a busimna ah Israel in zong nasiatak a thuhkikna hangin, Palestine gammi 25000 kim sikhin bek tham loin, inn leh lo tampi kizancip in supna lianpi om khin ta hi. Tua bek tham loin, nek leh dawn, zatui zaha kicin lohna nasiatak khang semsem ahih manin, UN akipan leitung gam tampi in huhna puak ziahziah uh hi.
Gaza khuapi sung a om mipite bomb leh thauvui thautang lakah annek ding leh dawn ding tui siangtho kisapna, zatui zaha kitangsam in zatote-ah liamna baina leh sihna thuak uh ci-in Guterres in gen hi. “Mihing kihehpihna / kihuh kipanpih ding cih thuhoih tawh hanciamna akineih hangin, kizopna lampite khaktanna leh Gaza khuapi sung luttheih nading ciangtannate nasiatak kibawl bek tham loin, tatsat loin nisim Bomb khiatna hangin, mipite’n lauhuaina tuak uh hi” ci-in genbeh hi.
UN Charter thubulpite leh guptuam paih tuam nei loin, thu lekkim takin sep khiatna ahi Bandung thulet bulpite tungtawn in kipawl khopnate kimuthei hi ci-in UN General Secretary genkhia hi. Ahi zongin Israel Prime Minister Benjamin Netanyahu in bel Palestine gam Gaza kidona tawh kisai-in, hih kikap/ kidona gal bei khit dongah Palestine te pen langpan / langdo den ding hi ing ci-in genkhia hi.
Hits: 0