India – Myanmar gamgi Chin State, Paletwa township kikapna pan Camp nusia in, India gamah galtai SAC galkap 400 val bang a om kawmkal ah gamgi dung khakcip (Sik dailing) kai dingin India Home Ministry in genkhia hi. “India – Myanmar gamgi dung khempeuh khakcip dingin India kumpi in khensatna nei hi” ci-in Assam State ah khualzin India Home Ministry Dept. Minister Amit Shah in January 21, 2024 ni-in genkhia hi. Tai (750 Miles) val a sau gamgi umna ding vai bang hunah kipan dinga, bang tan sawt ding cih genkhiatna neilo hi.
India – Myanmar gamgi Chin State sungah kikapna hangin Myanmar gam pan India gam, Mizoram State ah galtai a tul asim om uh hi. Tuate dinmun pen Free Movement Regime (FMR) kici gamnih Visa kisam loin gamgi kantan theihna ID te zong kizangsak nawnlo ding cih thu India Kumpi in gelna nei ta cih thu The India Express Newspaper ah pulakkhia uh hi.
India – Myanmar gamgi dungah Daikaih ding a ngimna bulpite pen India kumpi in kiciantak genkhiatna omlo hi. Ahi zongin India- Myanmar gamgi Chin State, Paletwa Township leilu lamah Rakhine galkap (AA) leh Maraland Defense Foce (MDF),te leh SAC galkapte nasiatak kikap uh hi.
Tua kikap/ kidona hangin Myanmar galkapte guallel in Mizoram State sungah galtai uh hi. SAC galkap galtaite tawh kisai Sazian kingahna ah abeisa November 13, 2023, Nov, 13, Nov. 29, December 29, leh 2024 January 6, ni cihte ah SAC galkapte India gamah a zalom a simin galtai uh hi. Jaunary nipi masa sung ciangciang 5 vei galtai uh a, galkap vekpi gawm 500 val cih kiza hi.
Hits: 1