Sagaing Region, Kalay Township, Kalaymyo ah Ukna buluh (SAC) te in khua sung vak khangnote manin Galkap kisinna sangah puak uh cih thu khuasung mite’n gen uh hi. Abeisa October 18, 2024 nitak lamin zong SAC palikte in Motorcycle tuang khangno thumte thu sitin uh cih thu a mukha Kalaymyo khua mi te’n gen uh hi.
“Mi nih tungsiah Motorcycle a tuangte man uh, kum cinglo naupangte bel abeisa hun khat lai-in, tu / ding (Stangding and Sitdown) hih sak uh. Kum cing khinte ahih leh bel sum a ut zahzah ngen uh himai. Tun bel tua dan kingah nawn loin, kum cing nai lote in sum pia peuh leh suakta sak lel in, kum cing khin sate ahih leh bel Sakhan lamah puak uh. Tunitak lamin kum 18, 19 gual pasal 3, Motorcycle a tuang khawm Leipi gei a om Hnin Tet Tet Wai Store mai ah SAC palikte in thusit in Sakhan lamah paipih ziau uh himai” ci-in Kalaymyo khua mi khat in Tongsan Media ah gen hi.
October 17, 2024 ni-in zong khangno 6, ukna buluh (SAC)ten man uh ci hi. Kawl kumthak (Thadingyut) khalik ni ahih teng tawh Khua sung vak mi tam phadiak ahih manin lamka bom munte ah ngakin banmat uh ci hi. Tua banah abeisa September kha Nipikal tawp lam akipan Ukna buluh (SAC) galkapte Kalaymyo leh a kiim khuaneu tengah khangnote kaikhawm uh a, mat a thuak pawlkhatte Ks. Teng (20 – 40) cih bangin sum pia-in kitansak napi, a tam zaw bel Galkap dingin paipih uh ci hi.
Ukna buluh (SAC) galkap sinna phual, No. 6 ading khua sung mi khangno sawmnih kiim kaikhawm kik uh a, Sakhangyi Khua gei a om SAC galkap sinna phual No. 10, ah kipuak cih thu Kalaymyo khua sung miten Tongsan Media tanute’ tungah gen uh hi.
Hits: 3