Mandalay Region, Madaya township, Yenantha khua a om Police Station pen Mandalay PDF te’n busim in lakhiazo uh a, a galmatte leh galvante July 6, 2024 ni in mipite’ muhtheih dingin Photo tawh kiciantak lahkhiatna nei uh hi. Yenantha Khua pen Madaya township leilu lam tai 6 kim gamlatna munah om hi-in, Madaya township sung Mandalay-Myitkyina Lampi tungah om hi.
Yenantha khua police station pen Mandalay-PDF te in July 4, 2024 ni-in busim in lakhiazo hi cih thu khuamite in July 5 ni in tangko khia uh hi. Athu suahna sungah Madaya Township sung a om Sakhantha Camp, Kyaukmandat Camp, Sapakyi-taung Camp, Kyaukkyan-taung Camp, Ngwepahtoo Camp, Shinma-taung Camp, Nagapat Camp, Nwar Khyankone Camp,Wuntinkone Camp, Lettann-taung Camp, Chi-tawyar Camp, Koyinlay-taung Camp, Kin ywa Camp, Sedaw Lanekwe Camp, Yenantha Tollgate, Yenantha Police Station leh Pat Hle-Inn Camp cihte akipan SAC galphual vekpi gawm 25 kilakhinzo ta hi ci-in MDY-PDF in genkhia hi.
Galphual-laknate’ sungah SAC galkapte kiang pan akingah galvante lakah 120mm motar khat, MA series assault rifles namte, G3 / BA63 battle rifles te leh thauvui thautang tampi ngah khia hi cih zong pulak uh hi. Madayar township Operation ah Mandalay-PDF pen Madayar township man leh SSTF te tawh kipawl in galdo khawm uh cih kiza hi. Madayar township sung a om SAC khutzat Pyu Saw Htee te in a galvante uh khia in Mandalay-PDF te kiangah kipumpiak (Surrender) cih pulakkhia uh hi.
Tua gal kidona pan a mat uh SAC galkap 6 te ii photo zong Online tungah lakkhia uh hi. June 25 ni in a hong kipankik “Operation 1027 ” te’ galdona-ah National Unity Government (NUG) ii ukna nuai aa om ahi Mandalay-PDF leh local PDF dangte in Mandalay Region sungah galkuan khia in galdo ciatciat uh cih kiza hi.
Hits: 4