October 9, 2023 || Tongsan Media Group ||
Hamars ngongtat pawlte in October 7, (Saturday) ni lametloh laitak Israel te akap ziahziahna uh tawh kisai-in, Israel te’n zong dokik / thukkik (Phula) dingin pulak banah gal huh ding asap / akoihbeh banah Harmasa te’n Gaza zangkuam teng nasiatak akapna thu tuni October 9, 2023 ni-in Israel galkap te’n pulakkhia uh hi.
Israel galkap thugenpi tui galkap Admiral Daniel Hagari in bel a genna ah Hamars ngongtat te’ busimna Gaza zangkuam pen Israel te’n ngah kik ta uh cih thukante’n genkhia uh hi. Israel te’ ukna / thuneihna mun sung a lut Harmasa pawlte zong leizon san laitak uh cih tui galkap mangpi Admiral Daniel Hagari in gen hi. Hih kikapna hangin tuni October 9, 2023 nitak lam ciang Sazian kingahna ah Israel te 700 kim leh Gaza ah 500 kim si uh ci hi. UN in zong Gaza ah mipi 130000 val inn le lo neilo / kisiacip in om uh ci hi.
Israel defense spokesman Lt. Col. Jonathan Conricus in zong galven deuh hun sungin Israel gammite a lau phawn Hamars ngongtat pawlte’ gal thahatna uh a pukcip dong phulak ding leh Gaza zangkuam pen Hamars te’n cik mah hunin a uk theihlohna ding kihanciam ding cih thu Twitter social Media tungah Video khahkhia hi. Gal huh ding Israel galkap 300000 val kikoihkhol khin ta cih thu Isarel galkapte’n pulakkhia uh hi. Isarel Defense Minister Yoav Gallat in zong Gaza kuam ah Electricity, annek tyidawn, namgim leh gas cihte zangsaklo / khaktan ding cih thu Social Media tungah Video tawh akhahkhiatna ah genkhia hi.
US Senate Majority Leader Chuck Schumer in bel a site’ lakah a tawm pen US gammi 4 kihel a, tua sang tamzaw thei lai ci-in gen hi. Tua banah misite’ lakah British gammi, France, Nepal, Thailand, Ukraine gammite zong kihel uh ci hi. Hih thu hangin EU Foreign policy chief Mr. Josep Borrell in zingciang October 10, ni ah thukin Meeting sam ding leh hih galvai tawh kisai kikupna nei ding gen hi. UN Security Council in zong zanni October 8, ni-in Kong kikalh khum thukin kikupna (Closed-door discussion) nei uh hi.
Tulaitak dinmun ciang ah Israel – Hamars kidona khauhpai semsem ahih manin, US te’n Vanleng pua Tembawpi 1, banah Jet Fighter honpi Israel gam neh lamah koih zihziah uh ci hi. Nung kaal sungin Gaza kuam ah phualsat a om Hamas ngongtat pawlten gamgi kantan in lutsim uh a, Israel te tha khat busim in , a kapna hangin, gal kipan hi-in, tuni ciangciang Israel gam leitaw lam mun pawl khat Hamas pawlte’ khut sung tung ta ci hi. Israel te’n tua mun teng nasiatak kap ngekngek in a do uh hangin, Gaza zangkuam buppi lakkhiat zawh ding ngimna nei cih thu tangko khia uh hi.
US President Joe Biden in bel a zumhuai Hamas te’ gamtatna pen ngongtat nasepna taktak hi ci-in, mawhsak bek tham loin, amau bel pawl Israelte’ zat ding a vui a tang akipan Galvan zat tuamtuam huhin puak ngekngek ding kamciam pia ta hi. Tua banah a sia penpen dinmun dong akituntoh khak leh zong a kisam bangbang a tawp dong panpih nading Mediterranean tuipi tungah Vanleng puakna Tembawpi ahi USS Gerald R. Ford leh galkap tampi puakbeh khin ta hi.
Kikapna pen nai 48 sung sawt khin banah langnih kigawm a si amang vekpi 1100 val sikhin ta hi. Israel ten ngongtat Hamas pawlte kumpi nasem leh nautang kigawm 600 val si-in, 100 val hing mat uh cih genkhia hi. US kumpi in bel Hamas ngongtat kihingmat te’ sungah nautang mi kihel / kihello cih limtak sit pha lai dingin genkhia hi. Gaza lamah zong Israel te’ phulakna hangin Vanleng tawh akapna hangin Hamas lamte 500 val si uh hi. Langnih a si aliam sazian bel amasa lam a kitheisa zah mah hilai phot a, lei lam pan limtak kisitkik lai leh tamzaw tham lai thei ding ci hi.
Israel te’ a dingin bel Hamas te tawh tam veipi kikapnate’ sungah tutung a pen a suksia pen dinmun hita hi. October 7, ni zingsang lamin Gaza lam panin a Tul sim Thautangpi tawh Israel te lam kap ziahziah uh a, tua kawmin Hamas ten Israel tawh kidalna / gamgi umna kantan in, mun 22 val pan galkap leh a vui atang tawh nasiatak kap ziahziah ahi hi. Hih zahtak a khauhpai galkikapna ah Hamas lamte’ ngimna leh geelkholhna pen Israel ten a theihkholh lona hangin, Israel thukante ( Israel’s military intelligence) nasiatak gensiatna leh mawhsakna om hi.
Hih Hamas pawlte’ galsimna ah Gaza munah phualsat a om Palestines thau tawi kipawlna pawl khatin a huh banah Iran kumpi tung pan zong huhna honpi khat kingah hi cih thu Hamas ten pulakkhia uh hi. US Secretary of State Anthony Blinken in a genna ah bel tutung a Hamas te ngongtatna tungtang ah Irante’ huhna akician in kimukhialo a, ahi zongin abeisa hun sawtpi lai akipan Iran kumpi in Hamas te huh den uh hi cih genkhia hi.
Source: VOA , BBC
Translated: Tongsan Admin Team
Hits: 11