Kawlgam ukna buluh (SAC) makaipipa Senior General Min Aung Hlaing ii Sen (China) gam a zinna bulpi pen China Kumpi leh SAC kikal meetna khat peuhpeuh om theihna ding ngimna tawh a zin hi dingin upmawhna om kici hi. China lam pan leitang vai-ah hamphatna ding a om mah bangin SAC ading zong gamsung bitna (Security) lam panpihna kisam ahih man hikha dingin gamvai thutheite’n ummawh uh hi.
China Prime Minister Mr. Li Qiang in China Embassy vai-ah Myanmar pen a thupi-in koih uh a, gamvai a hoih kikna ding leh a kikhelna ding a muhnate lungdampih a, Myanmar SAC makaipi Min Aung Hlaing in zong Myanmar gam kilemna ding leh sum bawlna sumzuakna lamah hong huhnate uh lungdam kohna kineituah cih thu Xinhua News in pulakkhia hi.
SAC makaipi Senior General Min Aung Hlaing in Ukna a buluh lai akipan China gamah a hawh theihna dingin China kumpi ii sap ding a lunggulh mahmah hangin, China kumpi in sang zolo uh a, Senior General Min Aung Hlaing’ ii tutung akhualzitna tawh kisai ah kikhelna nei uh hi, ci-in USIP pan Myanmar gam tawh kisai Director Mr. Jason Tower in gen khia hi.
“SAC makaipi Senior General Min Aung Hlaing in ukna a bulhkhit akipan China-te’n galvai pialo / huhlo hizen leh SAC in NUG leh PDFte sawtpi in lel khin ding uh ahih manin, tuni ciang a kalsuan theihna pen China kumpi-in, SAC panpih mahmah cih kimukhia thei pah hi.
Senior General Min Aung Hlaing ahih leh Myanmar gammite’ thukimpihna / panpihna a ngah hetlo banah Myanmar leilu lam leh Rakhine gam cihte akipan Myanmar gam sung mun tampi ah gallel / guallel mahmah ta hi. China-te’n Security lam tawh nasiatak a panpihna ding, sum bawlna le gam leitang China-te huh ding kilawm hi. A diakdiakin tulaitak Myanmar gam leilu lamah SAC pawlte in a gallelhna uh pen China-te’n investment a bawl nading mun thupi khat ahi hi.
“Min Aung Hlaing zang loin kua tawh khek ding ci-in hun khat lai-in ngaihsun uh hi. A hih hang, sanggam Shan Unau 3-te ahi MMNDA, TNLA, AA teng thahat semsemna hangin, Spring Revolution zai semsem a, a tawpna-ah mun tampi lawh ahih manin Min Aung Hlaing zatloh phamawh hi. Min Aung Hlaing pen thuneipi pen ahih manin Amah’n gamsung zo lel ding, ci-in a ngaihsutna uh khel hi. Min Aung Hlaing pen China gam pan Myanmar a ciah kik hun ciangin, Myanmar galkap (SAC)te abei mang ding lemlo sakna tawh thasanpih lai ding, cih ngaihsutna nuai-ah amahmah Kumpi hihsak lai ding a hanciam China Communist Party’ ngaihsutna hi cih upmawhna kinei” ci-in gamvai mipilten gen uh hi.
China in Myanmar galkap mangpipa a saptuam uh hi lo-in, gamdang tuamtuamte pan gam makaite tawh kibangin a sapkhop uh ahih manin, Senior General Min Aung Hlaing (or) SAC te pen China kumpi-in 100% tawh panpih ahih lohna Myanmar gamvai tawh kisai thuthei U Sai Tun Aung in genkhia hi.
“A cil lamin Daw Aung San Suu Kyi pen puansan phah tungtawn in a paisak lai uh tawh gam nih kizopna kibang nawnlo hi. Ahih hangin, tun bel akipan thak hizaw uh hi. China in Myanmar a siat ding aphal lohna leh leitang tawh kisai a meetna ding uh ngimna tawh damdam in, kizopna bawlpih uh cih thu kimuthei semsem hi. Lam khat pan China in gamgi-aa tualsung thau tawite gamgi khakloh na’ng leh kidona a khanloh na’ng a gen uh hangin, a khiatna om lo hi ” ci-in Jason Tower in genbeh hi.
“China in tualsung thautawite a khamkham uh hangin, Myanmar leilu lam a kidonate khawl tuak tuan lo hi. Chinate’n a kham khit teh Kachin leh Shan leilu lamah SAC te’n a galphual (Camp) te a banban in sum /tanlawh semsem uh hi. Tua mah bangin, Rakhine lam zongah lei lam kidona-ah guallel mahmah ta uh hi.
SAC taangin China-te’n kidona a behlaplap uh hi ding hiam, cih dot huai thu khat ahi hi. SAC leh Shan leilu lam a belpawlte’ kikapna tungtang tawh kisai pen China Kumpi in hih bangin a khaam keei pong uh hangin, local thuneite in Myanmar gamgi ah vanlut/ vanlakna vai buaina nei uh ahih manin hamsa thei ding hi,” ci-in gamvai thuthei U Sai Tun Aung in gen hi. Tua banah SAC makaih kiteelna vai tawh kisai zong Myanmar gam mite’ thukimpih nading in China kumpi in genpih thei hi ci-in Jason Tower in genbeh hi. Hih bang dinmun bialbual kawmkal-ah Chinate akidop uh kul hi, ci-in Jason Tower in gen hi.
“China-te’ phawk ding dinmun pen Myanmar galkap (SAC)te in daihna a om theihna ding lampi nei lo hi. Senior General Min Aung Hlaing in kiteelna bawl ding gen lai mai thei a, China-te in zong teel ding nei tuan lo uh ahih manin thukimpih mai thei ding hi. Ahih hangin, hih kitteelna in daihna a piansak sang sikin, mi tampite lungsim nasak zaw ding a, Langpangte khang semsem zawsop ding dinmun hi, cih kimu thei hi.”
Tutung SAC makaipi Senior General Min Aung Hlaing leh Myanmar sum bawl honkhat kithuah in China a zinkhopna ah Myanmar sumbawl makaite leh China sum bawl makaite tawh Nov. 5, 2024 (Tuesday) ni-in kikupna nei uh hi. Tua laiah Myanmar gam buaina tungtawn a sumbawlna a kiatcipna tawh kisai China sum bawlte tawh mapang khawm (China Investment) dingin zawn uh cih kimuthei ci-in, Jason Tower in genkhia hi.
“Myanmar Galkapte’ business management sep khialhna tawh khantohna omlo ahih manin, hih China investment vai pen lauhuai cih kician hi. Tua manin a tung-aa business investment ahi meileng lampi, electric nasepna, banah a diakin Kyauk Phyo tui thuk Gas Pipeline leh a thupi diak business zone-te, tuta dihin mainawt ding hamsa hi. Tu a China Companyte in a dang investment thakte bangzah khanto zo lai ding, cih dot huai thu khat ahi hi.” Tua hi a, tutung a China Prime Minister tawh a kimu Senior General Min Aung Hlaing lam pan MNDA, TNLA leh AA-te’n kilemna ding a ut uh teh bek kikupkik theih pan ding ci-in Min Aung Hlaing in pulakna nei hi.
Hits: 4