Tanintari Division, Karen National Union (KNU) uk sung Myeik-Dawei District, Palaw huam sung a om kum 20 val SAC galphualpi Le Phado (Kyauk lone-gyi) Camp pen Karen National Liberation Army (KNLA) Brigade (4) leh akipawlpihte in, ni 10 sung kikapna aneih khit May 29, 2026 ni-in lakhia zo ta uh, cih thu KNLA in genkhia hi.
Tua SAC galphualpi lakna pan galvan nam kim, nek le dawn tampi ngah khia cih thu KNLA Brigade (4) in genbeh hi. Kikapna-ah SAC galkapte a lom atang in si uh a, a dam lai 80 val taimang uh ci-in, KNLA Brigade (4) in, genkhia hi. Hih kum 20 val apha khin SAC te’ galphualpi pen Kyauklone-gyi khua sung pansan a om hi in, KNU, KNLA Brigade 4 Strategy khut nuai a om KNDO Battalion 7, KNLA Battalion 11, Battalion 203, Brigade 4 dron battalion te leh apawlte kipawlin a dokhawm uh ahi hi.
Hih bangin SACte’ galkap phualpi a kilakzawhna dingin mapang khawm ahi; KNLA leh belpawl khempeuhte leh thungetna akipan pantheihna kiu ciat pan mapang khempeuhte’ tungah KNU Myeik-Dawei District Chairman leh KNLA Brigade 4 Tactical Commander in lungdam thugenna nei ci hi. Tua bek loin SAC ii ukcipna khempeuh abei siang na ding, Federal bel pawl kician khat phuhkhiat zawh nading le nopna tawh bitna leh daihna bucing phuhkhiat zawhna ding ngimna tawh nuntakna piakhia khangnote mapan khopnate zahtakna thute pulak khia hi.
Hits: 4