Tongsan, September 18, 2026
Lamzang Baptist Church siapa ahi Rev. Dal Thawn Tuang pen September 14, 2026 ni-in Kawl galkapte in hong kaplupsakna hang un America kumpi in thukhenna le vaiteng a van nadingin Burma Research Institute (BRI) in ngetna nei hi. September 14, 2026 4:00PM kiimin kum 49 ahi Rev. Dal Thawn Tuang pen Kaptel gunlei ah kikap lum hi a, Lamzang Tuiphum pawlpi ah kum 22 sung Pasian nasem khat ahihna, a zi le tanu 2 tawh innkuan nei ahihna September 16, 2026 sih vui hunbawlna Lamzang khua pan kiza hi.
Siapa pen Kapteel gunlei gei ah Kawl galkap te in kaplum, thau tawh 3 vei a awm na kap uh, a gil le a phei te ah zong thautang khakna limma te kimu hi.
Hih vai tawh kisai-in Tedim Baptist Convention (TBC) in zong dahpihna lai September 16, 2026 ni-in nei uh a, “Rev. Dal Thawn Tuang pen Pasian nasem mi citak khat hi.” Cih tawh pahtawina na nei uh hi.
BRI President le American Baptist Churches USE te ii Secretary Rev. Dr. Robin Stoops in Rev. Dal Thawn Tuang ii innkuanpihte le Tedim Baptist Convention te tungah dahpihna kammal pulakna nei a, “Hibang pen thu ummite tungah kisimmawhna le kizawhthawna khangto mahmah ta hi.” Cih gen hi. BRI in zong siapa hong nutsiatna pen Kawlgam sung om thu um mite, biakinn le biakinn tawh kisai van le nate tungah kizawhthawhna le kisimmawhna te ii mitmuh theih liim khat hi cih genkhia uh hi.
BRI ii 2026 January kha thusuahsakna ah Kawlgam thuneihna a suhkhiatkhit nungah Christian biakinn 343 kisuksiatsak khi, Kawl galkapte thahlut 2022 pan 2025 kikal sungin 149 si khin, 218 te thong tang uh cih BRI in tangkona ah suaksak uh hi.
Zogam, Thanlan khuapi ah zong biakinn 22 om sung lak pan 21 te kisuksiatsak khin a, khua mi teng khempeuh in a khua uh gal hangin taisan gai uh hi cih zong BRI in suaksak behlai hi. Chungcung khua a om Chungcung Baptist Church Pastor ahi William le pawlpi mi Nam Ceu te zong June 4, 2026 ni-in Kawl galkapte in thatlum cih BRI le International Chrisitan Concen te in genkhia uh hi.
BRI president le CEO Zo Tum Hmung in American kumpi Trump in thu ummite tungah hibang simmawhna, zawhthawhna te pen mawhna lianpi le khialhna lianpi hi cih hong sansak a, hong kinpih ding gen uh hi. Tua bek hi loin American kumpi thunei lamte in thongkiate, biakna siate le Aung San Suu Kyi te zong Kawl kumpi in a suahtaksak nading un US kumpi in a gensak ding uh lunggulhna pulak uh hi.
Ref : Yangon Khitthit
Hits: 2