August 3, 2023 || Tongsan Media Group ||
Shan State leilu lam Muse khuapi kiang ah August 2, 2023 ni-in ni thapai phial nasiatak kikapna ah Ukna buluh (SAC) galkapte a si tampi om banah a galvan nam tuamtuam leh galvai vanzat tampi ngah khia ung ci-in, Ta-Ng Liberation Army (TNLA) ten August 3, 2023 nitak lamin pulakkhia uh hi. TNLA Brigade (1) military area, Muse township, Selan khuano huam Naatham leh Gongra khuano kim tengah August 1, 2023 ni zingsang 10:00am – nitak lam 4:00pm kikal sung ni thapai phial nasiatak kikap uh hi.
Ukna buluh (SAC) nuai a om the (99th) Army Corps, Kha Mah Yah- (420), Sa Ka Kha (2) Kha Lah Yah-(261), (421) leh Nam Kham town Militia te kipawl in, TNLA te’ omna lamah kuanin nasiatak kikap uh a, Ukna buluh (SAC) galkapte tampi si uh ahih manin, gallel lua in nung kin uh ci hi. Tua kikapna ah SACte leh khuami Militia lamte kigawm 10 si-in, 13 liam uh cih kiza hi.
Tua banah ukna buluh (SAC) galkapte’ tung pan RPG -1, Bomb RPG-7 namte pum 20, MA-1 lawng 1, AK-81 lawngkhat, (60) MM tangpi 1, (81) MM tangpi 1, (81) MM bomb tang 40, Set thaupi (machine gun) 1, Thautang tang 5000, kizopna setpi (communication device) mal 1, leh adang galvan nam tuamtuam tampi kingah khia ci-in, TNLA ten Photo record tawh lakkhia ziahziah uh hi.
August 1, 2023 ni kikapna ah tualsung mi 1 in sihlawh in, Kawl phungzi khat leh tualsung mi 5 liam uh ci-in, khuamiten gen uh hi. Muse township ah abeisa July 23 ni akipan TNLA leh ukna buluh (SAC) galkapte kikapna om a, tuni dong kizom toto ahi hi.
Hih hun sung akipan tuni August 1, 2023 ni ciang dong TNLA leh ukna buluh (SAC) galkapte kikal kido/kikapna 9 vei omin, tua kikapnate’ sungah SAC te 25 sikhin ta in, 27 in liamna ngah uh ci-in TNLA in pulakkhia hi. Tua banah SAC galkapte khat zong hingmat uh ci hi. Kido /kikapna a hang bulpi pen TNLA te’ phualsatna munah SAC ten va kap masa uh ci-in TNLA thugenpi in gen hi. Tua kikapna sungah TNLA galkap pawl khat liamna ngah uh himah leh a si amang pulakna bang mah nei lo uh hi.
Source: People’s Spring
Translated: Tongsan Admin Team
Hits: 12