Chin State leitaw lam Paletwa township sung a om SAC galphual thupi khat ahi Chin Letwa galphual pen kilakhiazo ta cih thu Arakan Army (AA) in tukha January 3, 2024 nitak lam (3:00pm) hunin Photo tawh kiciantak tangko khia uh hi. Tua a pulakkhiat Photote pen ni 3 sung kizom a dona pan a ngahkhiat uh Chin Letwa Camp banah adang galphual pan a ngah khiat uh galvan lianpi leh atangte, thauneu leh atangte, bomb tampi akipan khutlot bomb cihte kimuthei hi.
Chin Letwa khuaneu tung leh khuanuai ah nih sung pan Chin Letwa khuanuai a om galphual pen AA pawlin lakhia uh hi a, Camp tawh akinai Meter 200 kim gamlatna a om Chin Letwa khua ah Police station om hi. Tua Police station leh khuamite dinmun bangci om cih AA in pulakna nei lo hi. Kaladan Gunpi nisuahna lam Paletwa khuapi ii leilu lam Tai 39 gamlatna a om tua Chin Letwa Camp pen India gam, Mizoram State leitaw lam tawh kigamgi zawng ah om hi.
India – Myanmar sumbawl sumzuakna phualpi hi-in, Paletwa township sung a om Trone bual Strategy, Nubo Strategy, Khawai Strategy hill cihte AA in abeisa December 2023 sungin Lakhia khin banah Khamaungwa Camp leh Chin Letwa Campte pen tukha January 2024 kha bulin lakhiato leuleu uh ahi hi.
Kaladan Gunpi kiang a om tua SAC Campte pen Galkapna lam ah mun thupi mahmah cih thu AA thugenpi U Khaing Thukha in abeisa December 7, 2023 ni-in genkhia ngei hi. kaladan Gunpi dung zui in, Sitthwe Tembaw phual leh Paletwa khuapi ah Tembaw neu (Motor boat) tawh kituang in, Paletwa pan India – Myanmar gamgi Mizoram State ah Mawtaw tawh cih bangin kizomsuak hi.
Point (313) Hill Cam (Paletwa khuapi nisuahna leilu lam Meter 1700 gamlatna a om) akipan Paletwa (289) Strategy Hill leh Miwa Strategy hill te pen January 1, 2024 ni akipan kizom in kap ngekngek uh cih thu Paletwa area sung bek hi loin, Rakhine Region sung a om SAC galphualte khempeuh zong nuaizan mang dingin AA in genbeh hi. Miwa Strategy Hill pen abeisa 2020 kum kipat lamin AA leh SAC kikal ni 45 val kikapna Battalion phualpi hi in, Kyautdaw khuapi leh Paletwa gamgi ah om hi.
Paletwa Area sungah AA in tatsat loin SAC a dona Camp teng pen Khah Lah Zay (289), Khah Lah Zah (233), Khah Mah Zah (211) Paletwa, Khah Mah Zah (220, KHah Mah Zah (308), Khah Mah Zah (374), Khah Mah Zah (376), cihte hi ci-in AA pawlin Battalion minte tawh kiciantak pulakkhia hi. Tua Camp teng omna Khuapite pen Khah Lah Zah (289 Paletwa Township, Khah Lah Zah (233) Buditaung, Khah Mah Zah (211) Paletwa, Khah Mah Zah (220) Paletwa, Khah Mah Zah (308) Rambe, Khah Mah Zah (374) Kyautdaw, Khah Mah Zah (376) Kyaukdaw Township cih teng ahihna genkhia hi.
China kumpi ii geelsakna tawh Nothern Three Brotherhood Alliance leh SAC te’n abeisa December kha sungin 2 vei kimuhna leh holimna nei uh hi mah leh thukimna bang mah ngahlo uh ahih manin, Shan Northern Area sung teng bek hi loin, Rakhine State, Chin State zongah Tree Brotherhood Alliance pawlin Khuapi lakna, Camp lakna cihte tatsat loin neito ziahziah uh hi.
Shan State (Northern) ah Ta’ang galkap (TNLA) in abeisa December 2023 sungin Khuapi 6 nikhat halin lakhia ziahziah uh a, Kyautme leh Kutkai khuapite kizom in lakkhiatna ding belpawlpihte tawh nasiatak galdo uh hi. Kokang Region zongah Kokang galkap (MNDAA) in Laukkai Regional Command Headquarters lakhia uh a, nidang a amau Phualpi lui ahi Laukkai khuapi bup zong lakhia mang ding dinmun tung ta hi.
Ta’ang galkap (PSLF /TNLA) General Secretary Taa Boon Kyaw in a genna ah, ” Tuhun Khangthakte khempeuh khutkilen in, a lungsim hangsan takin khua-ul, sisan tawh System mantak in gal kido ding hi” ci-in 2024 kumthak ma in ama Facebook ah gelh hi. Tua mah bangin MNDAA makai Phoon Thar Shwe in zong Shan State (Northern) Kokang Autonomous Region lamkik / puahkik ding cih thu Kumthak thugenna (New Year Message) ah pulakkhia hi.
Mun khempeuh ah guallel mahmah a om SAC te’n a kahhsuahsa Khuapi lakna, Camp laknate tawh kisaite bel kiciantak in genkhiatna nei nai tuanlo hi. SAC thugenpi General Zaw Min Tun in nisim a thupulakna zong December 15, 2023 ni akipan gen nawnlo in tawlnga dide ta hi. Tualaitak SAC dinmun ahih leh Kawlgam mun khempeuh a piang galvai tawh kisai thumanlo / zuaupi vive nisim in genkhia ta uh hi.
Hits: 3