India Central Government, Home Minister in Mizoram State sungah Myanmar galtaite a gamvai uh a hoih kik mateng siah amau gamah puakkiklo ding banah galtaite huhna leh panpihnate piak suak lai dingin Mizoram State Chief Minister Pu Lalduhoma in Delhi pan Mizoram a ciahkik khit January 6, 2024 ni-in a genkhiatna thu The Indian Express in pulakkhia hi.
Mizoram State Chief Minister thak Pu Lalduhoma in, ” India Central Government in Myanmar galtaite amau dinmun tawh kituakin huhna kicing akipiakzawh kei phial leh zongin, ko, tawh hanciam khawmin huhna piak ding a baihsa in om ung” ci-in Delhi pan Mizoram a tunkik khit January 6 (Saturday) ni-in Thuthak saite tungah genkhia hi.
Abeisa January 4 (Thursday) ni Minister Amit Shah tawh akikup laitak in Amishal in, abeisa Mizoram State Chief Minister lui hunin a nialsa ahi gamdang mite tawh kisai thu le la (Document)te kaihkhop ding vai pen Pu Lalduhoma tawh kikupna nei thei ahihna thu Minister Amit Shah in gen hi. ” Hih vai tawh kisai in, Myanmar gamvai a ngeina a batkik mateng India Central Government in India gam sungah om theihna ding huhna ngen Myanmar gammite pen puakkik lo ding cih Mizoram mipite theisak nuam ing” ci-in Minister Amit Shah in a genkhiatna thu pansan in pulakna nei hi.
Thuneite’ genna tawh kizui-in, abeisa 2021 SAC galkap in ukna a suhkhiat khit akipan Myanmar gammi Chin /Zomi 31000 val Mizoram State ah galtai uh hi. Tua banah Manipur State pan zong Inn leh lo nusia in Mizoram ah galtai 9000 val om laitak uh hi. Chin /Zomi namte leh Kuki /Zo minamte pen Inntek Mizote tawh Unau khatin kizomte uh ahi hi. ” Manipur State ah minam vai buaina hangin Inn leh lo nusia in galtai mipite India Central Government in huhin panpih ding uh hi” ci-in Pu Lalduhoma in thuthak saite tungah genbeh hi.
Home Minister leh Pu Lalduhomate in India President tung pan kipsakna / khensatna bek ngak hi a, Mizoram State Innkuan lai bawlna leh kepcingna thukhunte zong kikupna nei uh cih kiza hi. 2019 kum March kha sungin kipsakna a bawlsa tua Thukhun pen gamveng gamte pan thumanlo / phalna omlo in a lut / a tengte khaktanna ding ngimna tawh gamdang mite a kitheihkhiatna ding ngimna nei hi.
A beisa a sawt nailo in India – Myanmar gamgi Km. 300 kim pen Khaktanna Dai (Sik dailing) bawl ding geelna vaiah Myanmar leh India gam nih thukimnasa ahi gamgi ah lutte Visa kisam loin, a galkhat ah Km. 16 ciang suakta tak luttheih, zintheina ding phalna (FMR) pen beisak ding vai India Central Government in pulakna nei cih thu genkhia hi.
Hits: 4