Mizoram State, Aizawl khuapi pansan Zosuante’ kipawlna lian pen khat ahi; Zo Re-unification Organization (ZORO)te’ makaihna tawh Myanmar gam Chin State sung a om Chin National Front (CNF), Interim Chin National Consultative Council (ICNCC), Chin Brotherhood (CB) leh Chinland Government makaiteng in September 21, 2024 ni (12:00Pm) hunin India gam Mizoram State, Aizawl khuapi a om Pu Lalmuanpuia Punte, ZORO Vice President & Adviser to Chief Minister (Political) room-ah kilemkikna leh kitelsiamna om theihna ding deihna tawh a (1) veina thukikupna / holimna thupitak nei thei uh cih kiza hi.
Tua tutkhopna hunah Pu R. Sangkawia (ZORO President) in meeting makaih a, Pu Rohmingthanga Kawlni (ZORO Vice President) in hun kipatna ding thungetna nei hi. Thukikupna sungah ZORO makaite’n a thusunna ah, Myanmar gam Chin State sung a om Zosuan Unaute’ sungah kimuhkhialhna / kitelkhialhna hangin khat leh khat kilangpan bek tham loin, Thau tawh kikaplupna leh kithahnate’ hangin, ZORO in a lunghimawhna leh lainatna nei uh ahih manin, kitelsiamna leh kilemkikna a om theihna ding lampi kizong hi” cih thu pulakkhia uh ci hi.
Pu L. Ramdinliana Renthlei (ZORO General Secretary) in a genna ah, “ZORO in kilemna palai asepna tawh kisai a genna ah, “India, Myanmar, Bangladesh a om Zosuante pen unau laizom taktak i hih manin, akilangpan leh akikhen theilo, mapang khawm dingte i hi hi. Kua mahmah gal leh sa in, akinei dingte i hipeuh mah kei a, galdo khawm, mapang khawm dingte hihang” ci hi. Ei Zosuante pen Pasian thu-um i hih mah bangin, i biak Pasian in eite hong huh dinga, nikhat ni ciangin pumkhat suakin mapang khawm pelmawh ding hihang ci hi.
Tua banah Pu Lalmuanpuia Punte,(Adviser to CM & Vice President ZORO) in a genna ah, “Tuni kikupna leh holimna hunah Chin State a om sanggam Zosuante’ sung kitelkhialhna hangin, kivuak / kithahna tungtang ah kilemkikna ding ngimna ah makaite leh palai nasemte kihelkim thei ahihna hangin, a lungdamna pulakkhia hi. A mahin a genbehna ah, ” I sanggamte kilemna ding pen Mizoram government in kideihsak mahmah hi. Mizoram Government in ZORO tungtawn in Kilemna Palai hong sem sak hi. Tua mah bangin India Government in zong kilemna om theihna ding deuh mahmah bek tham loin, huhna leh panpihna zong hong pia nuam uh hi” ci-in pulakkhia hi.
ZORO mapanna tawh kilemna bawlzia ding tawh kisai thukhun genkhopna zong hoih tak kinei a, anuai a bangin sepkhop zia leh mapankhop zia ding thukhun kibawlkhia hi. Tua thukhun bawlna ah Pu Dr. Lorain Lalpekliana Chinzah (Adviser to Chief Minister) zong kihel thei ci hi.
Chin National Front (CNF), Interim Chin National Consultative Council (ICNCC), Chin Brotherhood leh Chinland Government tengin September 21, 2024 ni-in, Zo Re-Unification Organisation (ZORO) makaihna tawh Thukikupna leh holimnate a paikhawm tengin thukimnate lungsim takpi tawh pulakna kineikhia hi.
Kilemna Ding Thukhunte:
(1) Ei Zosuan (Chin-Kuki-Mizo) te pen pianna pi le pu kibang, pau le ham kibang, (same language – different dialect), nuntakzia kibang, pupa ngeina / tawndan akibang, lam-etna kibang a lenkhawmte, cidam leh mual khatah suak khawm, i sih leh guam khatah adah khawm unaute hi hang.
(2) I gam leh minam tawh kisai i mapannate ah a hoih ding deih luatna hangin unau sanggam i ki muhkhialhna leh kitelkhialhnate poi kisa mahmah a, tua bang gamtatnate nidang ciangin a om nawnlohna ding thukimna kinei hi.
(3) Tunung ciangin buaina leh haksatna hong om khak phial leh zong thagum leh galvan zangin gamtatna neihloh dingin thukimna kinei hi.
(4) ZORO mapanna tawh hih kilemna thukhun kibawl pen hoih kisa ciat a, a bukim kilemna leh kipumkhatna a om theihna dingin akisam bangin kikupna neih toh zel ding hoih kisa hi.
(5) Kilemna bawl makai pawl (Committee) phuh ding hoih kisa a, meeting kik ciangin Kilemna (Peace Committee) phuhkhiat ding thukimna kinei hi.
Hits: 2