Gamdang a tung Kawlgam mi kiciante peuh mah Kawlgam-ah a ciah kik peuhpeuh ciangin, galkap tum hamtang ding thukhun (Civil Service Law ) pen SAC in zatsawm ta uh ahihna Thanintari Region sung a om SAC galkap ding mi zong pawlin pulak khia uh ci hi.
Abeisa February 10, 2024 ni akipan SAC in a nuntaksak kik uh (Civil Service Law) tawh kizui-in, gamsung gampua a om Kawlgam mi limlim galkap tum ding cih thu ahi hi. Gam pua pial theihna (Passport) a neisa Myanmar gammite zong thukhun tawh a kituah leh galkap tum ding uh hi. Tua bangin akisep theihna dingin galkap kaikhawm pawlin thupiaknate thukhun a suah khit uh teh kitaangko khia ta ding ci hi.
2024 February 10 ni akihingsak kik Civil Service Law pen pasal kum 18-35, leh numei kum 18-27 kikal gammite’ zuih ding hi a, koikoi-ah om ta leh vaipuak nei ci hi. Gamdang a tungsa Kawlgam mite ciahkik ding hi. Tua bangin a ciahkik nading theih tawp in geelgeel uh hi, ci-in Thanintari galkap kaikhawm pawl lam pan kiza hi.
Tulaitak i thuzak danin Civil Service Law a kisuah khit teh gamdang a om Kawlgam mite’n gam kanna lai a hun bei (Expired Date) ciang ahun behlap na’ng Galkap kaikhawm pawlte’ thukimpihna bek tawh kiphal/ kibawlsak thei bek ding, cih thuthang kigen khengkhang cih kiza hi. Gamdang tung Kawlgam mite a diakdiakin galkap tum thei lai dingte in a tumloh phamawh hi. 2024 May kha akipan a kihong mipi galkap sinna pen October kha ah a 6 vei cing ta a, kal simin a kisam zah mi omlo ahih manin, SAC in gam bupah mipite banmat kawikawi uh cih kiza hi.
Hits: 1