Tukum 2024 USA President kiteelna ah Democratic party pan Vice President Kamala Harris leh Republican Party pan US President lui Donald Trumpte nasiatak kidem uh a, November 5, 2024 ni-in America gam buppi mee (Vote) khiatna akineihna pan President lui Donald Trump in gualzawhna ngah ahih manin, US President kum 4 sung US Innkangpi (White House) ah tukik ding hi ta hi. President kituhna gamkee (State) tengah Mee tang (Vote) vekpi gawm tang (535) sung pan a gualzote’n a tawm pen mee tang 270 a ngah kisam a, mee tang (vote) kisimkhit ah President lui Donal Trump in a tawm penin mee tang (277) tawh gualzawhna ngah hi.
Republican party pan Donald Trump ii gualzawhna pen leitung gam tuamtuam pan gam makai pawl khatin lungdampihna leh pahtakna thupuak ciat uh hi. Tua lungdampihna thupuakte’ sung pan USA te’ pawlpih gamte’ sung pan Israel’ Prime Minister ahi Benjamin Netanyahu in Lungdampihna thu a gen masate lakah khatin kihel hi.
Ukraine gam President Mr. Vladymyr Zelensky in zong lungdampihna a puak banah leitung buppi galvai-ah daihna leh kilemna a omna ding hanciam ning a ci den Donald Trump’ ii kiciamna pen a hoih lamin dawng kik hi. Donald Trump’ thugente pen Ukraine gam daihna ding apiangsak taktak ngeina leh dan (policy)hi, ci-in gen beh hi.
Tua banah NATO kipawlna Secretary Mr. Mark Rutter in zong Donald Trump’ makaihna tawh kipawlna thahat semsem ding cih a lam-etna leh a kipahpihna thu puak hi. France gam President Mr. Emmanuel Macron in zong Donald Trump tawh kum 4 sung khut kilenin nasepkhop kik ding genkhia hi. US ii belpawl pih mahmah ahi UK Prime Minister Mr. Keir Starmer leh Australia Prime Minister Mr. Anthony Albanese te’n zong Donald Trump’ ii gualzawhna a lungdampihna uh lai khak uh hi.
Tua zomah China President ahih leh USA President kiteelna a zahtakna thu gen hi. India, Philippines leh gam pawl khatin zong Donald Trump’ gualzawhna ah lungdampihna leh pahtawina lai khak ciat uh hi. Russia Kumpi Vladimir Putin in ahih leh Donald Trump ii gualzawhna tawh kisai tuni ciangciang genna bang mah nei nai lo phot hi.
Hits: 0