Myanmar gam Ukna buluh (SAC) Makaipi Senior General Min Aung Hlaing pen China gam akibawl a (8) veina Greater Mekong Sub-Division (GMS) Khawmpi simna pan tuni Nov. 10, 2024 ni-in Kawlgam ciah kik a, Nyipyidaw International Airport ah Ukna buluh makaipi huh General U Soe Win makai-in, SAC lubawk pawl khat banah Myanmar movie kineihsiam (Actors and actress) ahi; Director Yin Zaw Maung Maung, Yan Aung, Soe Myat Thuza, May Than Nuh, May Thandar Oo, Zin Nyi, Yone Lay, DingDong leh Chinese minam hon khatin na dawn luailuai uh ci hi.
Myanmar ukna buluh (SAC) makaipi Senior General Min Aung Hlaing pen abeisa November 6-7, 2024 sung China gam Kunming khuapi ah kibawl a (8) veina Greater Mekong Sub-Division (GMS) Khawmp pai hi-in, China Kumpi tawh kihona a neih banah China companyte’ bawl military Drone hoih mahmah namte Myanmar mipite kapna dingin va ngen khual khual ci hi.
Tua banah Cambodia gam Prime Minister leh Laos gam Prime Minister te tawh khawmpi ah Kawlgam vai kamkupna neihpih in, ASEAN meetingte ah Myanmar gam tangin amau (SAC)te akihel theihna dingin naupang khemin, va khem bawl gawp ci hi. Myanmar gamah hong tung ding 2025 ciangin gambup kiteelna a neih sawmna thute zong genpih gawpin, China kumpi huhna zong va ngen ci hi.
Myanmar gam vai tawh kisai thuman thutak tawh vaihawmna a om theihna dingin Myanmar mipi thuneihna a buluh Military Council (SAC) makaipi Senior General Min Aung Hlaing in China kumpi kiangah ngaihsutna (Advice) tuamtuam va ngen ci hi. Ukna a buluh zawh a khatveina China a zinna ah Prime Minister Li Qiang akipan Combodia, Laos, Thailand, Vietnam gam makaite leh Chinese sumbawl makaipite tawh kimuhna nei bek tham loin, Kawlgam ah Investment bawl dingin sapna nei cih kiza hi.
Hits: 3