Chin State, Mindat leh Falam khuapi nihte ah phualsat ahi ukna buluh (SAC)te Camp te Chin Revolutionary Group ahi Chin Brotherhood Alliance pawlin nasiatak do uh a, hih khuapi nihte lakhia zo / ukcipzo ta ci-in, Chin Brotherhood Alliance thugenpi Salai Tin Me in December 3, 2024 ni-in pulakkhia hi.
Chin State leitaw lam a om Mindat khuapi leh leilu lam a om Falam khuapi bulphuh SAC te’ galphualte khempeuh Chin Brotherhood in December 9, 2024 ni akipan kido ngekngek pen tuni December 3, 2024 ni petpet ciangin khuapi leh galphualte kilakhiazo / thuneihna kingah taktak cih thu Salai Tin Mee in genkhia hi.
” Ko, Chin Brotherhood Alliance pawlin Mindat khuapi leh Falam khuapi pen abeisa November 9, 2024 ni akipan SACte’ galphualte nasiatak ka do ngekngek uh hi. Tu in ahih leh Khuapi sungah lutzo leh thuneihna nei thei ta dinmun ah ka om ta uh hi. Tua hi a, tun bel gualzawhna dial khai thei dinmun kitung taktak ta hi” ci-in Salai Tin Mee in genbeh hi.
Hih kidona sungah Ukna buluh (SAC)te a si aliam tampi om banah a kihingmat zong honpi om hi. Tua banah galvan zong tampi mah kiman/ kingah khia ahih manin, tuate a sawt loin hong kitangko khia ding hi ci-in genbeh hi.
Hih khuapi 2 lakna ah Chin Brotherhood Alliance sung akipawl teng ahi; Chin National Organization (CNO/CNDF), CDF- Mindat, CDF- Kanpalet, ZFU- PDF Zoland, CDF-Matupi Brigade 1, Mara Defense Force (MDF), banah Burma National Revolutionary Army (BNRA), Khangthak GZA galkapte cih teng kipawl khawm uh cih kiza hi.
Hits: 6