Chin State, Hakha – Thantlang khuapi kikal Mawtaw lampi tung a om SACte’ galphual khat ahi, Kiamtlang Camp pen Ukna buluh (SAC) pawlin galkap behlap in, kaalkhat sung nasiatak a dokikna pan tuni December 9, 2024 ni-in ngahkik uh a, CNA leh a pawlte nung kik phot uh cih kiza hi. Hih Liamtlang Camp pen mun laizang galdona ding a hoih mahmah mun ahih manin, langnih tuak pan nasiatak kituh huai mahmah mun ahihna Chin thautawi pawlin gen uh hi.
Abeisa November 30, 2024 ni a Kiamtlang Camp kikapna ah SAC lam pan Battalion Commander kihel 11 si-uh a, 19 hingmat uh hi. Ahi zongin tusung ni 2, 3 tengin SAC pawlin Hakha khuapi ah pualsat a om galkapte behlap in, nasiatak a dokikna pan CNF leh a pawlten lel in nungkik phot uh ci hi.
” Hih mun bel Hakha township sung suak ve! Hakha khuapi ii Gofl kuan kiang Mualtung khat hi. Ukna buluh (SAC) pawlin galkap 200 behlap in ni 10 sung hong kapna kido/ kidalzo himah leh ni 1 sung bekbek in kidozo nawnlo in kinungkik phot suak hi. Hakha khuapi lakna ding hih Camp pen mun thupi mahmah khat hi. Tu’n SAC pawlin ngah kik leuleu cih thu pen kamdawn hi loin, a hitakpi / thuman hi” ci-in Chin Media pawl khatin genkhia hi.
Chinland Council galkapte in abeisa Nov. 22 ni-in Hakha – Thantlang kikal teng leh adiakin Hakha khuapi kiang a om ukna buluh (SAC) Camp pawl khat kido/ kikapna pan Camp 8 kilakhia khinzo bek tham loin, SAC lamte a si aliam tampi mah om hi. SAC galkap 20 kim hingmat in, galvan namkim mal 60 val kingah khia ci-in CNF thugenpi Salai Hteet Ni in genkhia khin hi.
Hits: 1