Rakhine State, Maungdaw khuapi ah SAC Camp a om lai ahi No. (5), Border Guard Police Sub-base No. 5 (BGP-5) pen December 8, 2024 ni in a kilakhiat banah Maungdaw region buppi ki-ukcipzo ta ci-in Arakan Army (AA) pawlin tuni December 10, 2024 nitak lamin pulakkhia uh hi. Nah Khah Khah (5) Camp i cih pen Maungdaw khuapi Myotu Gyi veng sungah om hi a, SAC galkap 700 valte’ omna Camp lianpi khat ahih thu AA in genkhia hi.
Hih Camp kimkot khempeuh sikkhauling thuap 2 in ki-umcip a, khat leh khat kikal ah electrict sikkhau (barbed wire) nasiatak kibawl hi. Mun pawl khat pi (ft. 20) a zai Tui luanna / hawk guam thukpi kito in, tua sungah singvum (so) kidawh ziahziah hi. Kiuli nei kimkot ah kiuli/ pangli a nei nasiatak akibawl galpanna Banker lian (20) val leh banker aneu akipan Overhead kigawm vekpi 100 val om hi. Camp huangpi sungah a khauh leh akip mahmah Inn lianpi 30 val kilam gimgem ci hi.
Tua banah Camp kimkot buppi phial ah original/ nature ngiat a omsa Lui guampi khatin dalcip ahih manin, olno tak a kilutzawhna ding peuh mah hilo ci hi. Arakan Army (AA) galkapte ahih leh damdam ( letmat khat khit khat) in kin toto in, galdona Camp thupi khat ahihna genkhia uh hi. Hih Camp lakkhiatna sungah SAC galkapte’ koih M14 nam Mine tang vekpi 1000 val Arakan Army ten lakhia zo uh himah leh Mine zong siam pawl khatin a pumpi, khut leh khe tanlawh uh ci-in gen hi.
Nah Khah Khah (5) Camp sungah SAC galkapte, amau a huh Islamic Extremist thau tawi kipawlnate ahi; RSO, ARSA, ARA leh SAC galkapte’ thusinsaksa Islamic Extremist pawl khatte banah Maungdaw region tawh kizomto khuapi pawl khat a om SAC galphualte pan a taikhia galkapte khempeuh in Nah Khah Khah (5) sung pan a dawldawl in leilam galdona, vanlam pan kapna cih bangin a munmun pan nasiatak dopih ziahziah uh ci-in Arakan Army pawlin gen uh hi.
Abeisa kha 2 lai akipan hih Nah Kha Khah (5) Camp pen Arakan Army pawlin a umcih thapaih uh hi a, 2024 October 14, ni akipan galdona kipan hi. Kidozawh a ni vekpi 55 bang sawt khin ta hi. Nah Khah Khah (5) Camp galsimna hun sungah Aralan Army lamte in galsimzia siamna nam tuamtuam zangin, Battalion khat leh khat tha kituak leh kilungtuak takin galdo uh a, gualzawhna ngah uh ahihna AA ten gen hi.
Tua banah SAC galkapte misi luang zong luang 450 val kimukhia khin ta a, Buthitaung Khuapi, No. (15) Camp, Operations Command Headquarters, ah galkap mangpi / makaipipa Commander ahi Brigadier General Thurain Htun, SAC commander officer Captain Wai Linn Aung leh Officers, Santhum akipan nautang honpi leh RSO, ARSA, ARA leh SAC sungah galkap zia ahilh Islamic Extremist thau tawi kipawlna pan galkap tampi kihingmat ci hi. Galvan nam kim leh galkapna ah kizang van tuamtuam zong tampi kingahkhia ci hi.
Hits: 0