Chin State, Tedim khuapi ah Kikapna om ding cih launa hangin Tualsung mipi pawl khatin van leh nate tuahtuah ta cih khua sung mite’n gen uh hi. Abeisa December 26, 2024 ni akipan in Tedim ah kikapna om kha leh galtaina abaih zawkna ding ngimna tawh van gilte kinawnkhia khia ta cih kiza hi.
Tuah khiat / puakkhiat ding a haksa Vanlian leh van manphate pen abeisa December 29, 2024 ni akipan mun muan huaina leh khuanote ah nawnkhia uh a, gal tung leh zong tua munte mahah tai dingin gen uh hi. ” Bang thu hong piang ding cih bel kigenthei lo himah ee. Ei lam pan a baihsa in omlimlim leng gal kikapna om vat kha leh tai pah theih lian ding cihna hi. Falam khitteh Tedim kipanpah ding cih kiza ahihna tawh kilauthawng himai” ci-in Tdim khuami khatin gen hi.
Tedim pen Chin Brotherhood (CB) pawlmi ahi PDF-Zoland galkapte’ thuneihna mun himawk in, Falam khuapi akilak danin Tedim zong khuapi lakna dan mahin, kisem ding hi cih Chin Brotherhood te’n gen uh hi. Abeisa May 26, 2024 ni-in Tedim khuapi ah Ukna buluh (SAC)te leh PDF Zoland te kikap uh a, PDF Zoland pawlin Tedim police Station leh SAC Camp honkhat lakhiazo uh hi.
” Tedim khuapi kikap masak tungtang ah zaksakkholhna om lo ahih manin, ei mun ciat pan kitai/ kibumang himai hi. Tutung petpet ciang bel kigingkholh ding mah hoihzaw veve in teh! Tua bang ahih kei mawk leh i neihsa vangil, vanmanphate beimang ding dan hi.” ci-in khuami khatin genbeh hi. Abeisa May 2024 sung akikapna tungtang ah SACte’n Vanlam pan bomb khiatna leh Mei tawh a halna hangin, Tedim khuapi ah Inn 70 val vut leh vai suakin, khuabuppi galtai mang uh hi.
Hits: 1