– SAC Galkap kumpi in China kumpi huhna tawh Great Firewall ci-in Kawlgam bup sunga om Internet khempeuh a control theihna ding a hanciam ahi hi.
– SAC in Great Firewall thuah zo hi zen zen leh internet website tung panin gamdang website te kilutthei nawnlo bek tham loin, amau hoih sak website te bek Kawlgam bupin zattheih dingin hong koih bek ding uh hi.
– Great Firewall pen Transmission Control Protocol (TCP) tungtawn in Website te control ding uh hi. Tua bangin Great firewall tawh control thei le uh Google Search, Facebook, Twitter, Wikipedia cihte a kipan gamdang News tuamtuamte Kawlgam sung panin ki-en thei nawnlo ding hi.
– DNS ( Domain Name System ) a kici IP Address te a lem / atuh hong bawl ding uh a, URL ah a lut leh a pusuak packet te sit in mi khempeuh in bang hih cih hong en cik thei ding uh hi.
Gentehna: Tulai tak China in a gammite Facebook tuh zangsak in, bang message kikhak cih a kumpi te un mu pah pah uh hi.
– 2021 Feb 1 ni akipan SAC ukna a kipsuak hi zenzen leh State khempeuh ei mau muntek hong uk sak zawzen ding uh hi. Ahih hangin Kumpi bawl Internet bek zat khuan hong pia ding uh ahih manin, Tua tungtawn in kawlgam mikhempeuh hong en cik thei ding uh hi.
– Great Firewall pen virtual private network (VPN) zangin website ih lut nopna ah hong tunlo in amau ii deih teel website te ah hong lutsak ziau ding uh hi.
– Tulai tak Kawlgam sunga omte a dinging VPN naleng zong SAC in IP address pan in hong block thei lai ahih manin VPN a zangte in kuamah theihsak loh ding thupi mah mah lai ding hi.
– Great Firewall pen Website khempeuh a ki lut thei lo ding in, a khaktan hi in, Cisco Huawei leh Semptian hardware tawh a kibawl ahi hi.
– Great Firewall in na IP address te automatic in na save ziau ding a, na website lut te hong khak tan ding a, mun dang website khat ah hong lut sak ziau ding ahi hi.
– Hih bangin SAC in Great Firewall a vai hawm na pen, Thumaan lo tawh gammi te beng hum cip ding, a ut bang vua gamta ding, News thumaan kithei lo ding, thumaan ki theh thang thei lo ding cih ngeimna tawh a vaihawm uh ahi hi.
GREAT FIREWALL thu a thei Khangno te in hih bang tawh khang sawn sawn nuntak ding ut lo uh ahih manin SAC pen nuntakna kham in do uh hi.
GREATE FIREWALL bang hiam cih a thei mel lo te pawl in bel, Inn kihal sak ding peuh lau in SAC ukcip na sungah a tu khang a ta khang in khateh dawh sawm suak lai phot uh hi.
By: Joseph Khaipi
Hits: 3