I vei luatna tawh i gen ciat pong hi a, “Hong lem un” a ci, thau tawi kipawlna khat zong om nailo hetlo hi, cih phawk masa phot ni.
BAIH LO DING
Mo ciah khat samin palai i sep ciangin inntek lam ten ek kha zeenin hong na ko ekh thei mawk uh a, thuak teta kul hi. Mo ciah hiloin pasal thau tawi cingteng, “Kei bek ka pang zongin lau lo” ci a kipante lemtuah dingin i lung a duai zo taktak ding hiam? thaulawng muk hong kingat thei ding thu ahi hi.
ONLINE ZOOM TUT TAWH LEM LO DING!
Online pen namdangte a dingin a lem zongin Zomite a dingin lemlo kha ding hi. Kilemna ding Zoom tut laitak in, A – side leh B – side supporter-te comment hoihlo ahi, huih thau tawh hong kido ding uh ahih manin thangpaihna hong lian zawsop thei ding hi.
THU LAIVAT MAKAI I MU ZO DIAM?
Biakna vai ah i kikhen zelzul manin leitung thu vantung thu ah hong lemtuah ding haksa hi. I makaite pil thei mahmah uh himah leh “Amah bel A- side, amah bel B – side” ci-in mipi in koihna khat ciat nei ta mawk hi.
PASIAN LOIN
Kumpi Davidte innkuan bangin Pasian in hong khenkhap ahih mawk leh bel kigawm nading i vaihawmna teng nangawn kikhenna hong hi zawsop ding hi. Pasian in hong leptuah nading thungen ciat ni.
MAWSI (MOSES) I KISAM HI
Jacob tapa 12te, a Pa’ lam pan a ki-et uh ciangin unau hinapi uh, a Nu’ lam pan a ki-et uh ciangin Pi’ li suan (Khanglui pau in, Nu 4 nei cihna) himawk uh a, kituambawl nuam ciat uh hi. Tua beh 12 teng a gawmzo pen Mawsi ahi hi.
I Nu’ lam ahi, I pau awkaih, i beh, i khua, sim leh mal kideidanna teng bei sakin, i Pa’ lam ahi Pu Zo suan, Ciimnuai a piang teng kaitui bang hong gawm ding, i Mawsi kua pen aitam maw, ci-in ka ngakngakna lamin ka sam kangin teek lam ka manawh ta hi.
“Topa aw ka sih main Zomite’ Mawsi mu nuam sing ee maw, Zomite’ Khanan (Canaan) gam nopna ciam kha nuam mah sing ee maw”!
Evan. Langh Do Khup
Khuata mipa
Hits: 6