Zogam (Chin State) sungah Khuapi uk (Township) 9,10 kim a omna sungah Tedim township leh Tonzang township pen Zomi (Tedim kampau)te’ teenna hipha diak hi. Tonzang township, Kansau khuaneu pen a gam uh hoih / gamnem mahmah khatin kiciamteh in, kim leh pam singkungte zong khangcing leh khangham in, gammang tulak (Forestry) hoih mahmah mun ahi hi.
Kansau gam sung Kaphi lui leilum lam a om Lainengtang mualdung leh Seitual tawh gamgi ciang, Zangsiallui kikal huam sung gammang tulak (Taaksing)te pen hoih thei mahmah ahih manin, leitang hoih sak bek tham loin kim leh pam kepna lam zongah nitang guahtuite hunman takin kingah sak ci-in kiciamteh ahi hi.
Tua hi in, hih Kansau gam sung a om Taaksing te pen mimal sumbawlna / angsung hamphatna ding ngaihsutna tawh ZRA EC Galkap Makaipite ahi Pa Zomung leh Pa Piangsut te in gam nei Kansau khua mite leh Hausate’ phalna leh theihpihna omlo pi-in, zawh thawh thu tawh ZRO min zangin abeisa October 28, 2023 ni-in Singte laksakna ding Kansau khua hausate leh mipite’ tungah lai pia uh ci hi.
Amaute gel pen khua khat (khua kibang) hi uh a, ZRA EC galkap makai thuneipi tuak ci hi. Hih gamvai tawh kisai pen amasa in Tuikhiang khua Hausa Pa Kim Ngin leh Singgial khua ateng Pa Gin Suan Pau @ Paupi in ZRA EC bupi Pa Piang Sut tungah Kawl sum Kyat (Teng 150) tawh Kansau khuamite phalna omlopi in zuak sim uh ci hi.
Kansau khua makaite in hih thu a zak uh ciangin Pa Piangsut kiangah Tuikhiang gam leh Singgial gam hilo in Kansau gam ahihna agen uh ciangin, Pa Piangsut heh mahmah mawk ci hi. Pa Piangsut pen pilna / laitan a neihloh hangin, ZRA galkap makai panmun len khat a suak hi-in, ZRA/O min zangin ZRA EC makai khat mah ahi, a khuapihpa Pa Zomung tawh kipawl in Kansau gam mun pawlkhat thagum tawh laksak uh hi. Ahi zongin ZRA/O Cabinet Meeting leh President theihpihna omlopi in lai pia in, a sutkhia / laksak uh ci hi.
Hih thu tawh kisai Kansau khua makaite in ZRA EC makaipi Pu Khamminthang tungah akoh uh ciangin, agam leitang kilaksak (kiteng) hi loin, a Singte kilaksak (kiteng) bek ahi hi. ZRA Seal kitum khin ahih manin kikhelkik thei nawnlo hi ci-in dawng kik cih thu kiza hi. Tua banah abeisa 2022 kumin Singgial khua ateng Pa Gin Suan Pau @ Paupi leh Pa Thang Khan Mung in Kansau gamah Beng ciinna Beng lei) bawl uh a, Kansau khua makaite in a khawlsak hangin khawl nuam tuan loin, ZRA makaite kiangah Kansau khua makaite hek uh ci hi.
Tua thu hangin ZRA EC Zumpi Dalkhai khua ah sam uh a, ZRA EC makaipi Pu Khamminthang leh ZRA galkap bopi khat ahi, Pa Zomung te in November 17-20, 2022 ni in Kansau khua makaite thusitna nei uh ci hi. Tua Beng ciinna (Beng lo) te suksiatsak kei un la, sum ngen un cih tawh kilepna / thukimna bawlsak ngei uh ci hi. Kansau khuate phalna omlo pi in a gam uh ah Zavom / Beng ciin nawnlo / khawlsak ding akigen ciangin ZRA EC makaite kiangah ahek / akhiat mawk pen thu lamdangpi khatin kingaihsun hi. Zogam, Tonzang gam sungah Beng a cing sakte pen kuate hi mawk hiam cih ngaihsut huai mahmah hi.
Kansau gam pen Zavom / Benglei kiciinna leh a nim dildial Singkungte, a gam neite phalna omlo pi-in hici bangin akibawlsiatsak mawk pen a nungta Pasian in zong awi hetlo bek tham loin, atu a tate khang dongah, natna gilo leh thusia lasia in zui taktak ding ahih lam uh phawk uh hizen leh hih bangin gamta ngam hetlo ding uh hi. Tua banah ” Zomi leh Zogam akem / a cing hi ung” ci-in a mau leh amau kilimgen mahmah uh hi.
Tua bek tham loin, abeisa 1997 kum a piang Manipur State, Churachadpur ah Kuki (Thahdo) gal hangin India Zomite kihutna ding ngimna tawh Churachudpur sung a om Zosuan namkee (Tribes) tuamtuam kipawl khawmin kiphuankhia ZRA/O kipawlna min pen Kawlgam Zomite tungah amau mimal hamphatna dingin a ut bangin a zatna hangun sim leh mal Zomi a kuama ciatin nasiatak kimawhsak / kimawhpaih mahmah hi.
Tukum 2024 January kha akipan Kansau gam ah Singte zawh thawh thu tawh laksak (Teng sak) in, at ziahziah uh a tulaitak Mawtaw tawh puakhia ziahziah ta cih thu February 14, 2024 ni-in kiciantak kitheikhia cih kiza hi. Tua hi a, hih bang gamtatzia pen a khawl mengmeng kei uh leh atu a tate khang dongah Kansau khua mite khasiatna, hehna leh a nungta Pasian taw satna thuak pelmawh ding uh cih khuamite in Social Media tungah akhahkhiatna pan kitheisawn hi. Zomite i biak Pasian in hong nusia kei ta hen!
Source: Facebook Online Social Media
Posted: Tongsan Media Group
Hits: 15