Chin State, Tedim Township sung Keizaang leh Muizawl khua kikal ah May 2, 2024 nitak lamin Zomi Revolutionary Army (ZRA ) leh (CNF /CNA) te kikaptuah uh a, CNA lamte 2 si-in, ZRA lam pan 2 liam cih thu kiza hi. May 1, 2024 ni zingsang in zong Tedim township, Laitui khua kiangah kikaptuahna mah om ci hi.
CNA in amau mun leh mual / thuneihna ahilo munah hong lut uh ahih manin, kikapna a piang hi ci-in ZRA (Eastern) Makaipi Pu Zothang in genkhia hi. Democracy ngahna ding galdona pen hoih mahmah a, ahi zongin khat leh khat mun leh mual kiluhsakna leh kisimmawhna pen thuhoih hilo hi ci-in Pu Zothang in genbeh hi.
Tulaitak SAC tawh kikap/ kidona hun hoih paulap in CNF makai-in Chinland Council nuai ah kipawl khawm Thau tawi pawlin, Khuamite’ phalna ngenlopi in, Chin Brotherhood pawlte’ thuneihna sung teng a buluhsak sawm uh a, a lut veve uh leh Chin mipite’ sungah kilemna leh kipumkhatna susia bek loin, sisan naisan luanna piang sak ding uh cih Chin Brotherhood pawl 6 te in, May 1, 2024 ni-in thupulakna nei uh hi.
Chin State sungah ZRA leh CNF kikal kikap / kidona om thei den hi. ZRA in Myanmar gam Chin State sung Tonzang township, Tedim Township leh Sagaing Region- Kalay Township, Tamu Township- Kabaw Valley, Myanmar – India gamgi sungah panla uh hi. Tua mah bangin CNF te zong Myanmar gambup kikap/ kido khawlsanna ding thukimna (NCA) suaikai Chin Thau tawi kipawlna khat hi uh a, Chin State sung Thantlang Township ah phualpi nei-in, Hakha, Tedim, Matupi khuapi ah zumkhen nei-in gamtang uh hi.
Hits: 4