Chin State, Falam District, Falam khuapi pen abeisa November 2, 2024 ni akipan in Falam khuapi ah mipiten a inn leh lo uh nusia in taisan khia mang ta uh ci hi. Mipi taikhia a tamzaw Mizoram, Zophai, Kalaymyo, Yangon leh Tedim township lamah cihte ah galtai in kithehthang cih thu kiza hi. Abeisa October 9, 2024 ni-in Falam khuapi a om Ukna buluh (SAC) ten khua sungah thaupi mawk lot / kap gawp uh ahih manin, mipi galkap Chin National Organization – CNO/CNDF pawlin hun ciangtan om loin, taikhiat theih ding Falam mipite kigingkhol sak uh ci hi.
Falam khuapi pen CNO/CNDF leh mapanpih Chin Brotherhood (CB) te tawh kipawlin a sawt loin Mission Jerusalem (MJ) cih min tawh Falam khuapi buluhna (Operation) neih sawm uh ahih manin, mipi tam zaw in Falam khuapi nusia in galtai ziahziah ta uh ci hi. Ahi zongin tuni ciangciang bel bang mah Operation om nailo ahih manin, mipi pawl khatin CNO /CNDF makaite mawhsak uh ci hi.
Ahi zongin CNO/CNDF makai lamte in bel, “Jerusalem Operation” ni leh hun ding hun dingte kigencian thei lianlo mawk ahih manin, mipite lam pan kiginkholh hamtang ding kisam hi” ci-in zaksakna nei uh ci hi. Falam khuapi ah Ukna buluh (SAC )te in mun 7 ah phualsat ta uh a, galkap vekpi 150 val bang om dingin ki-ummawh ci hi. Falam mipite zong tawm khat bek om lai uh a, CNO /CNDF leh Chin Brotherhood (CB) pawlin bel Christmas leh Kumthak ma in Falam khuapi lakkhiat zawhna ding hanciam uh cih kiza hi.
Hits: 5