Chin Brotherhood (CB) pawlin Falam khuapi lakna maban kizomzom lai cih thu CB makaipi Salai Thang Chun Phe in gen hi. Chin State, Falam leh Mindat khuapi lakna galdona pen abeisa 2024 November 9, ni akipan akituak lianin kisim/ kido hi a, 2024 December 21, ni-in kilakhiazo ta hi. Ahi zongin Falam khuapi pen Kha Lah Yah (268) battalion bek om lai-in, Falam khuapibup bel kilakhiazo suak hi.
” Galdona maban kizomtoto dinmun hiphot hi. A vekpi lakkhiat ding dinmun kitungzo nai deuhlo suak phot” ci-in CDF- Mindat Chief Commander Salai Thang Chun Phe in kha nih sung a sawt Falam khuapi lakna tawh kisai genna nei hi. Galdona tawh kisai bel tulaitak dinmun ah a neng atawng in genkhiat theihna om nailo ci hi.
Thukhat panin Chin Brotherhood in kipawlpihte tawh Lakkhitsa mun leh khuapite a banban in zoptohtoh laitak hi ci-in gen hi. Chin Brotherhood in lakkhiat ding geelnasa khuapite’ lakah Chin Brotherhood member ZFU /PDF-Zoland te’ phualsatna ahi Tedim khuapi zong om lai hi.
Tua kawmkal ah Chinland Council (CC) tawh galvai, gamvai asem khawm ahi Tedim Township Council, PDA -Tedim kici pawlin zong a kipawlpih CC tawh Tedim khuapi laksawm uh a, kilimthawi mahmah uh a, ahi zongin Chin Brotherhood leh ZFU /PDF-Zoland in khakna thukizasak hi. SACte’ beina dingin nasem mah ahi Chin Revolution tengin Tedim khuapi lakkhawm dingin Tedim Township Council in ngetna nei hi.
Tua hi a, Chin Brotherhood member PDF-Zoland in PDA leh CNF te’ Tedim khuapi laksawmna pen deihlo / thukimpihlo ahihna thu tuni January 15, 2025 ni-in thusuahna bawl uh hi. Chin Brotherhood in Zomite’ khuapi ahi Tedim khuapi pan Ukna buluh (SAC) galkapte hawl khia in, a suakta mun leh leitang asuak dingin geelna neihna thu zasak uh hi. CNF /CNA leh akipawlpihte’n bel sep masak / lut masak ding bekbek a sawm uh ahihna kitheikhia hi. Tedim leitang pen kuakua kipawlna khutah kipia ngeilo ding ahihna leh a lut veve te Chin Brotherhood tawh khut kilenin nasiatak kinilkhia ding hi cih kizasak hi.
CNF /CNA, CDFs kicite kipawlkhopna ahi Chinland Council (CC) tawh akilen/ kipawl CDFs kipawlna 6 te leh Chin Brotherhood te kikal ah abeisa hunin mun leh leitangukna tawh kisai buaina leh kikaptuahna om ngei khin hi. Chin Brotherhood pen Arakan Army (AA) tawh galvai ah akipawl khawm kipawlna khat ahi hi.
Tulaitak in Chin Brotherhood leh Chinland Council kikal ah Tedim khuapi lakna ding vaiah buaina leh kitelkhialhna thak khat om kik suak a, tua buaina a liat semsem lohna dingin Chinland Council leh Chin Brotherhood makai thuneite tungah dotna kinei a, Chin Brotherhood galvai ah makaipi Salai Thang Chun Phe in a genna ah kipawlna khat ii thuneihna leh ukna leitang tungah zaktakna nei loin, gamvai paulap a Mipite’ tawholhna leh gamtatnate a khawlsan ding uh kisam hi ci-in genkhia hi.
” Galbukno khat nangawn a lakhia zolo kipawlna khatin Khuapibup laksawm cih limlim pen Mipite lawpsakna maimai leh khuapi a laksawm taktak ahi Chin Brotherhood /ZFU (PDF-Zoland)te lungsim nawngkai saknopna hi a, SAC te panpih in, nasepsak tawh kibang linlian hi. Ko, Chin Brotherhood (CB) in bel ko maban geelsa om bangin kikalsuan toto ding himai hi” ci-in Salai Thang Chun Phe in gen hi. Gamtatna tawh a lakkhia Chin Brotherhood te in mipi tawh kizom in, a mau tawh mapang khawm suaksuak ding hi ung cih gen hi.
Chinland Council sungah akipawl CNF thugenpi ahi Salai Hteet Ni in zong Tedim khuapi lakna ah ding tawh kisai Chin Revolution khat leh khat kikal buainate a khan semsem lohna ding sepzia ding vai a ngaihsutna uh kidong nuam himah leh kizopna / phone kingahzo nailo hi.
Chinland Council leh Chin Brotherhood te nih pen Chin State sungah Ukna buluh (SAC) a bei siangna ding nasem ding a hanciam/ a awng khia tuak uh ahi hi. Tua banah Chin Revolution te khempeuh kipumkhatna ding leh kilemkikna ding kisam mahmah ahihna zong a nih mahun genkhia tuak uh a, a hi zongin mualsuah zawhna ding langnih kikupsan laitak in, buaina thak khat akibehlap dinmun hileuleu hi.
Hits: 9