July 7, 2023 || Tongsan Media Group ||
Manipur state a om Kuki – Zomite leh Meiteite kikal minam vai buaina tawh kisai India Central Government tawh kizopna leh holimna neih theihna ding ngimna tawh Indigenous Tribal Leaders’ Forum (ITLF Committee) kiphuankhia hi. Hih ITLF makaite sung pan Pagin Haokip (Chairman), Muan Tombing (Secretary) leh Thangzamang Hangsing (Ex-Officio) tengin Central Government tawh kimuhna leh holimna nei dingin July 6,2023 ni-in Delhi khuapi lam zuan uh cih kiza hi.
Tua kimuhkhopna ah thusun ding abulpi pen Manipur State sungah Zosuante in Meitei te tawh teng khawm nawn loin, a tuamin om theihna ding “Total Separation from Manipur” cih thulu hi ding ci hi. Thukikuppih dingte pen July 7,2023 ni-in, Director of Intelligence Bureau tawh kimu masa ding uh a, July 8,2023 ni-in Home Secretary leh July 9, ni-in Union Home Minister tawh cih bangin kimuhna nei ding uh cih kiza hi.
Thukizak sawnna khatah India Prime Minister in hong tung ding August 15 India Independence Day ciangin, hih Manipur buaina tawh kisai thuhoih vaihawmna khat teitei leitungbup theih dingin pulakkhiatna nei ding cih kiza hi. Manipur buai kipat May 3, ni akipan July 6,2023 ni ciangciang misi vekpi 109, khua kihaltum vekpi 197, Inn kihal vekpi 7000 val, biakinn kihal vekpi 359, Inn leh lo neilo vekpi mimal 41425, Dongtuak Camp ah etkol a om mimal 204 cih kiza hi. (Ref: ITLF Bullettin)
Source: ITLF Bulletin
Translated: Tongsan Admin Team
Hits: 4