India gam Manipur state, sung a om Police station khat November 11, 2024 nitak lamin Kuki – Hmar minam thau tawi pawlin va busim uh a, Manipur Police Commandos and Central Reserve Police Force (CRPF) te tawh nasiatak kikaptuahna piang hi. Tua laiah minutes 45 sung ding kikaptuahna om a, Kuki- Hmar Thau tawi pawlte 11 si-in, Police lamte khat liam ci-in Manipur state, Police thuneite’n gen uh hi.
Tua banah India CRPF pawlin Kuki- Hmar thau tawite’ galvan Rifile lawng 1 leh khutlot bomb hon khat zong ngah beh uh ci hi. Tua kikapna kimah Manipur police leh galkapte kibehlap lai uh ci-in Manipur state police thunei khatin genbeh hi. Tukha November 7, 2024 ni-in Hmar minam sang siamah Nu Zosangkim Hmar pen kibuan in, a sisa in akimuhkhiatna hangin, Kuki-Hmar Women kipawlna makai in lungphona nasiatak nei toto uh hi. Tua thu hangin Kuki-Zo Council in amau gam huam sungah namdangte mawk lutsakloh ding thusuahna leh deih ngetna nei ngei uh hi.
Myanmar leh India gamgi neh a om Manipur State ah abeisa 2023 May kha sung akipan mualmi / singtaangmi thau tawi Kuki – Zo leh Meitei (Katee)te kikal ah minam buaina hangin, a hunhun in kikaptuahna om zelzel hi. Hih Meitei (Katee) leh Kuki-Zo kikal minam buaina hangin, a beisa 2023 kum sungin Kuki-Zo lamte mimal 180 valin sihlawh uh a, inn 50000 val inn leh lo nusia in galtai uh hi.
Hits: 5