Rakhine State, Maungdaw township leh Thandwe khuapi kidona ah SAC galkapte misi luanghawm 750 val leh galvan tampi kingahkhia hi ci-in Arakan Army (AA) in thusuahna nei uh hi. AA in Rakhine gamsung panin SAC galkapte a vekpi in beimang sak ding cih a ngimna tawh kitzui-in, SAC battalion tuamtuamte a banban in do uh a, Western Commands omna Ann khuapi leh Ngapali Beach omna Thandwe khuapi akipan gamgi kem galkapte (Border Guard Forces 2), Border Guard Forces 5 te omna Maungdaw khuapite ah kidonate nasiatak omlai hi ci-in pulakkhia uh hi.
Abeisa November 13, 2023 ni akipan Rakhine State sungah kidona pen kha 7 leh a lang bang sawt khin in, tu’n tuuk-hun sung ahih hangin AA in kidona khawllo in nikhat khit nikhat nasia semsem hi ci-in gen uh hi. SAC galkapte zongin Leilam, Tuilam, Vanlam cih teng zangin, galnan cipna (defensive battle) lam tawh hanciam pha mahmah uh hi. Ahi zongin SAC galkapte in lel mahmah uh ahih manin, galvan nusia in kipumpiak (Surrender) dingin AA lamte’n ngetna / zaksakna nei den uh hi.
June 23, 2024 ni-in Ann khuapi a om SAC ii van guard tactical operations base ahi Taw Hein Taung tactical operation commands pen lakhin zo uh hi. Tua galphual lakna dingin kha 2 val bang galsim uh hi a, AA lamte zongin supna pawlkhat om hi mah leh SAC galkap misi luanghawm 750 val leh galvan thauvui thautang pawlkhat zong ngah khia uh ahihna thu AA ten pulak uh hi.
Tua tactical hill top base panin a taimang SAC galkap te nung delhin akap gawp ban-ah, Western Commands omna ahi Ann khuapi pen a kimkot khempeuh pan umcih in nuai cip uh cih thu AA in genbeh hi. Maungdaw township sung kidona ah No. 17 Military Operations Commandte kipawlkhawm in a ngak uh ahi BGF-2 galphual pen AA in July 6, 2024 ni in lakhia zota uh hi.
Tua galphual panin SAC galkap luanghawm 350 val, thauvui thautang leh galvan a tuamtuamte ngahkhia zo uh hi. Abeisa April 13, 2024 ni akipan Thandwe khuapi kidona thu zong gen uh-a, June leh July kha sungah kidona nasiatak in om kikin, July 5, 2024 ni zingsang in Ngapali (Mazin) Airport lakhia zo uh hi.
Thandwe khuapi a om SAC battalionte ahi; Infantry Battalion 566 leh Infantry Battalion 55 te banah, Division 101 khutnuai aa om Light Infantry Battalion 235, Light Infantry Battalion 251, Light Infantry Battalion 252, Light Infantry Battalion 253, Light Infantry Battalion 254, Light Infantry Battalion 255, , Light Infantry Battalion 256, , Light Infantry Battalion 257, Light Infantry Battalion 258, Light Infantry Battalion 259 leh Infantry Battalion 315, Myeikhtila – Light Infantry Division (99) – Central Command, Infantry Battalion 366 (Mawlaik – Military Operations Commands 10 – Kalay), Northwestern Command, Ayeyarwaddy a om battalion pawlkhat, Thandwe township kim Pyithusitt battalion pawlkhat leh Myanmar Navy SEALs cihte kihel in dokik uh ci hi.
Tua banah SAC te in Bay of Bengal ah kiphualsat ahi Navy War-ship 5 a om galdona Tembawpi, Kwinwine, Tapyukchaing leh Gyeiktaw mun a om artillery te, vanleng kapnate leh drone tampi tawh huhin, lei lam, tui lam, van lam kigawm in nasiatak dokik hi ci-in AA in genkhia hi. Thandwe kidona pen Rakhine State sung aa khuapi (Myo) laknate sung pan a haksa pen kidona hi ci-in AA in genkhia hi.
SAC lamte nasiatak a liam banah SAC galkap misi luang 400 val leh thauvui thautang bulompi ngah khia hi ci-in AA in thupulakna nei hi. Thandwe aa om Infantry Battalion 566 pen June 27, 2024 ni in lakhiazo banah Thandwe khuapi kiim aa om galphual dangte zong lakhin uh hi cih thu zong AA in pulak beh uh hi. SAC Galkap te in Infantry Battalion 566 a suplawh khit uh ciangin Thandwe khuapi, Airport sung leh airport kim abuilding te, a minthang hotel te leh Ziiphyu-kone aa om inn khat panin defensive war bawl uh cih thu pulakbeh uh hi.
Tu-in Thandwe aa galphual khat a cianlai Light Infantry Battalion 55 la dingin a dosan laitak hi cih thu zong genkhia uh hi. Tua banah a taimang SAC galkapte pen nung delhin kisumaimang khin hi cih thu Light Infantry Battalion 55 tawh kipawlin Division 101 ii khutnuai, Pakokku khuapi a om Light Infantry Battalion 252 leh adang min theihloh battalion tuamtuamte kigawmkhawm in Light Infantry Battalion 55 leh a kim panin dokik hi cih thu, SAC in tui lam leh van lam pan in zong do in kidona pen tuni nitak lam dong nasia mahmah laitak cih pulak hi.
Rakhine State sung kidonate ah nuntakna a piakhia Rakhine galkap (AA) te, hangsan takin command leh amua duty ciat pan asem khia Rakhine galkapte, zatui lam nasemte, leh a panpih Rakhine gammite vekpi tungah lungdam mahmah hi cih thute akipan kiciantak kiciamteh hi ci-in, AA in genkhia hi.
Alang lam panin, AA in SAC ii a thupi galphualte ahi Ann, Western Command, Military Operations Command 5 Taungkok Headquarter, Sittwe Regional Operations Commands Headquarter leh Da Nyawaddy Navy Headquarter te pen khaktan khin ban ah, galphual pawlkhatte ah lut in galsim hi cih thu, galte ii galphual pawlkhat te zong a lang bang lakhia khin hi cih thu te zong gen hi.
Hits: 9