Mizo minamte’ sungah nungak lasiam minthang mahmah khat ahi Lia Lalnunfeli Fanai (Kum 34) in pumpi damlohna tuamtuam hang tawh February 12, 2025 (02:15am) hunin Ebenezer Hospital, Aizawl pan hong nusia cih kiza hi. Feli Fanai pen abeisa December 20, 2024 ni-in, damlohna hangin Aizawl zatopi kipuak a, Doctor te’n gimsa lua ahih manin, ICU ah koihin hun sawtpi sung mah kikem ci hi.
Tua bangin Aizawl Hospital ah hun sawt simsim akibawl khit nungah noptuam thei tuanlo ahih manin, January 6, 2025 ni-in Ebenezer Hospital ah kituahsak leuleu himah leh noptuam thei tuanlo in, February 12, ni-in hong nusia ta ci hi. A luang hawm pen Ramhlun North Industry mual a om a pute’ inn ah tawlkhat sung akikoih khitteh a teenna Champhai khuapi lamah kipuasuak pah ci hi.
Lia Lalnunfeli Fanai pen a neu lai akipan lasak uk mahmah khat hi in, ” Min Hlan Leh La” cih Music Album tawh lakhum kipan hi. Tua khit akipan lasakna lamah tua zahin lut nawnlo a, ahi zongin abeisa November 19, 2013 kum ciangin, laphuak siam tuamtuamte phuah Studio bawl masak pen Dawng 10 a bawl ” Fam Khawlawi” cih Album pen Chanmari YMA Hall, Aizawl ah honna nei hi. Hih Album pen a pianna pa sihzawh kum 1 phawkna tawh abawl ahi hi.
Tua Album a suahkhiat zawh kum 7 khit ciangin, a Album 2 na leh a nunung pen ” Pheichhehmawi I Khai Ang Aw” leh ” Tuma’n An Tluk Lo” cihte hi-in, January 30, 2020 ni-in suahkhia kik leuleu hi. Hih Abum pen Digital platform tawh kihawmkhia in, minthang mahmah zo hi. Apple Music cihte ah kikoih hi. Tua banah ” Lengdang Tang Abel., Michelle Varte leh Zaii Hauchhum te tawh a bawl ” Ka Tan I Mawi” cihte zong koih beh hi. Tua banah a debut Studio Album ah a late ” Then che Ka Hlau” cih leh ” Min Hlan Leh La” cihte zong koih kik hi.
Mizote sungah lasiam minthang leh melhoih mahmah akigen Lia Lalnunfeli Fanai @ Feli Fanai nusiatna pen Mizo khanglui, khanglai leh khangthakte khempeuh in pammaihsa in, supna lianpi in gen ciat uh hi. A nusiat innkuante leh a it a ngaite khempeuh Kha siangtho in hehnem ta hen!
Hits: 2