Chin State, Tedim township, Ngalbual khua a teng Pa Dal Muan Kim (Kum 23) leh Pa Kam Lian Thangte sungta pen abeisa February 6, 2025 nitak (8:30pm) hun pawlin ZRA te’n khua sung mun khatah nasiatak vua ngingei uh a, Pa Dal Muan Kim pen a phual ah sipah ci hi. Asih khit zankim (11:00pm) hun pawlin ZRA te mahin a inn ah a luang va puak uh ci hi. Pa Dal Muan Kim’ luanghawm ahih leh February 7, 2025 ni-in kivuibawl pah cih kiza hi.
A makpa Pa Kam Lian Thang zong ZRA EC te’ vuakna hangin, khua pawklo in nikhat sung kikemto himah leh Febuary 8, 2025 ni zingsang in a nuntak bei leuleu cih kiza hi. Hih minihte pen sungta hi-in Pa Kam Lian Thang pen amakpa ahi Pa Dal Muan Kimte’ inn ah a va hawh ci hi. Ngalbual khua sungah ZRA-EC te’n nitak (8:00pm) tungsiah vakkhiatloh ding thukham (Curfew) bawl uh a, Pa Kam Lian Thang in tua thu a phawk phetin a sungte’ inn pan ciah pah ci hi.
A ciahna lam kalah ZRA-EC te tawh kituak in ” Koi laiah pai na hiam? ci-in dong uh a, ” ka sungte’n a hawh hi ing” ci-in dawng ci hi. Na sungte kuate hiam? ci-in a sungpa Pa Dal Muan Kim sam sakin, a tun ciangin vua lum pah uh ci hi. Pa Dal Muan Kim leh Pa Kam Lian Thangte sungta pen Zu dawn / zukham ngei cih bang hi loin, mi lungnem thunuam mahmah sungta / makta ahihna thu Ngalbual khuami khatin gen hi.
“Zomi zingvai Zomite’n hawm hen!” cih thubulphuh anei ZRA-EC te’n Ngalbual khua ah Zomi pasal nih Gulthah Tangthah in a thahlupna hangin gamsung gampua a om Ngalbual khuamite khasia in, lungsim pumpi lauthawng leh linglawng in om uh ci hi. Tulaitak Kawlgam buppi leh Zomi bupin a kihtak leh alipkhap mahmah ahi Ukna buluh (SAC) leh Zomite’ galpi ahi CNF (CC)te’ sangin, Zomi leh Zogam hong humbit ding i muan leh suan ZRA EC te kihtak huai /mulkim huai zaw ta hilo maw ci-in, Ngalbual khua mite’n gen uh cih kiza hi.
Hits: 6