ZFU (PDF-Zoland) pan mipi galkap muan huai mahmah khat ahi Pa Pau Khan Khai (Kum 40) in Nov. 4, 2024 ni-in damlohna hangin hong nusia cih kiza ahih manin, Innkuanpihte leh naseppih alawm leh gualte khempeuh tawh kibangin Tongsan Media pan dahpihna i pulak hi.
Pa Khaipu pen abeisa hunin Kawl galkap (MLA) lui khat hi a, galkap sungah a om lai in, thaupi unit lam ah vaipuak asem khat ahi hi. 2021 kum bulin Kawl galkap (MLA) Tatmadaw in Ukna hong buluh ciangin, Ukna buluh (SAC) te kiang pan taikhia in, mipi galkap ZFU (PDF-Zoland) ah lut hi.
PDF-Zoland ah a lut ciangin, Kawl galkap sung a om lai a Thaupi Unit asepna pan a ngah pilna siamnate mah zangin, Ukna buluh (SAC)te dokik bek tham loin, atheih pilna khempeuh sit het loin, PDF-Zoland khangnote hilhto suak thei ahih manin, khantohna leh tampi om ci hi.
Tua banah Chin Brotherhood (CB) min tawh Falam khuapi a kilakna / kidona ah kihel bek tham loin, galkuanna pan damlo (cina vat) ahih manin gam sung pan zato kidelhpih pah himah leh zatui zaha tawh kikem/ kibawl man loin mual hong liamsan ahi hi. Hih bangin Myanmar gamvup leh Zogam suahtakna bukim (Federal Democracy) ngahna dingin a pilna, a siamna leh a nuntakna dongah a piakhia Zomi ngalliam Pa Pau Khan Khai pen zahtakna leh pahtakna lianpi i pia hi.
Source: ZFU (PDF – Zoland)
Hits: 5