Myanmar gam buppi Tuiphum Pawlpite’ Kipawlna a lian pen ahi; Myanmar Baptist Convention (MBC) in BM 2024 & a (125) veina Triennial Khawmpi pen tukha January 13- 17, 2025 sung Karen Baptist Convention, Headquarters, Franc Hall, Ahlone township, Yangon ah thupitak nei uh hi. Tua laiah ” Itna tawh kidim nuntakna – A Life filled with Love ” cih thubulphuh in nei uh ci hi. Convention, Association, Bible College, Local Church etc..pan akisehsa makai tangmi vekpi 445 kim kihelthei cih Rev. Dr. Lian (GS of MBC) in Tongsan Media ah zasak hi.
Tua Triennial Khawmpi hun sungah 2025- 2027 sung MBC Makaipi dingte panmun kiteelna zong nei uh a, Pasian leh mipite’ teelna tawh Rev. Dr. Thang Cin Lian in MBC- General Secretary, Term 3 na ding hong ngah kik cih kiza ahih manin, Zomibup aitang in Tongsan Media Group Inc,. pan lungdampihna lianpi i pulak hi. I biak Pasian in Dr. Lian maban sepna bawlna ah a lamdang in hong zatsak suaksuak lai ta hen!
“MBC- General Secretray, Term 3 na ciang dong mapang thei dingin, kei mimal pilna, siamna leh kicinna hang hi loin, mipite leh i biak Topa Pasian in hong deihna om a, hong kiteelto thei suak hi. Tua hi-in, tuhun (recent context) sungah sep leh bawl ding, hawmding, geelding tampite Pasian in hong hawmpih a, lam hong lah toh lai ding bek kei masuan ahi hi. Abeisa term 2 sung (2018-2021; 2022-2024) ah nong thungetsakna, nong panpih, nong thapiakte mah bang un mai kum 3 term sung maban khempeuh zongah thungetna tawh hong panpih ciat lai un ci-in huhna ngen kawmin lungdamna hong pulak ing” ci-in Tongsan Media tungtawn in thunget cialna leh lungdamkohna pulak hi.
Myanmar Baptist Convention (MBC) pen akipatkhiat zawh kum 211 a cing khin Baptist Kipawlna hi-in, tuni ciangciang Convention (18) leh amau leh amau thakhat in akizom Pawlpi (local) 2, Pawlpi vekpi (Churches) 5400 val, Lai Siangtho sang (53) cih teng tawh kipawl/ kilamkhawm ahi hi. Rev. Dr. Lian pen MBC-GS asem (12) na hi-in, MBC-GS asemte sungah Term 3 kizom asem amah bek mah hikha dingin kigen hi.
Hits: 3