Chin State, Tedim khuapi ah abeisa gal kidona hang a galtai khuamite Inn lam kizuan ziahziah himah leh khua sungah a puakkham nailo galvan / thaupi honpi khat kimukhia ahih manin, tuate a manlang thei penin hepkhiat / ngaihsut dingin khuamite’n genkhia uh cih kiza hi. Hih galvante akihepkhiat kei mawk leh mipite’ nuntakna lauhuai mahmah ahih manin, thunei Thau tawi pawlte in a manlang thei penpen in, a hepkhiat theihna ding kisam ci-in, khuamite’n gen uh hi.
“Lampi nawl leh huan sung tengah a puakkham nailo Thaupi leh bomb tampi kimukhia himawk in, tuate pen khuahun hang, ganhing leh mihing khat peuhin nawk kha thei ahih manin, a manlang thei pen a hepkhiat mengmeng ding kisam lua hi” ci-in Tedim khuami khatin genkhia hi. Tua akimukhia galvan kimuhkhiatna munte pen Myoma veng, Lawibual veng leh khua pua mun pawl khatah tampitak kimukhia ci hi. Tedim khuapi ah abeisa March 25, 2024 ni-in SAC galkapte leh Chin Brotherhood Alliance kikal nasiatak kikapna om a, khuami khempeuh phial a galtaina pan inn kician ta hi.
” Galtaite a vekpi phialin kiciahkik ta hi. Kikapna zong om nawnlo phot hi. Khuapi sung zong a ngeina dinmun ah om ta ahih manin, zanni July 2, 2024 ni akipan sangnaupangte sang kah kipan ta hi. Tu tadih bel No. (1) BEHS ah sangnaupang 200 val khawng sang ki-ap ta” ci-in Tedim khuami Sang sia khatin Tongsan Media ah zasak hi. Tedim khuapi a om Sang khempeuh akihon theihna ding ukna buluh (SAC) thuneite in, vaihawmsak uh a, sang tawh kisai sianthona leh akisamte sepsak / hanciamsak uh ci hi.
Abeisa Tedim khuapi kikapna ah SAC galkapte in mipite’ teenna Innte mei tawh halsak uh a, inn 65 val meikang tum hi. Chin Brotherhood pawlte in zong SAC te’ galphual mun 2 busim in, sutkhia zo bek tham loin, galmat hon khat leh galvan tampi ngah khia uh cih Chin Brotherhood Alliance pawlin June 18, 2024 ni-in thusuahna nei uh hi.
Hits: 3