4th July 2023 || Tongsan Media Group ||
Manipur state sungah Meitei ten Zosuan (Kuki-Zomi) te athah mai sawmna pen tu’n khanih bang sawtto ta hi. Hih thu tawh kisai in, Zo Reunification Organization (ZORO) in anuai thute siksan in leitung mun tuamtuam a om Zosuante’ theih dingin pulakkhiatna kinei hi.
(1) Kha nih pai khit nungah Zosuante leh Meitei te kikal kizopna / omkhopna pen akikhen siang suakta hi. Lungsim kituaklo bek hi loin, omna leh tenna kigamla semsem lai ding uh hita hi. Gamgi akikhung kipsuakta ahih manin, kilemna ding peuhmah genkhop theihna ding lampi om thei nawnlo hi. Tua hangin Zosuante leh Meiteite gam ki-ukna khat nuai ah omkhawm sak hamtang ding ngaihsutna pen a haivai thu hita hi.
(2) Meitei Chief Minister leh a seppih Minister te leh party member te akipan Meiteite’ tenna khua sung makaite kampauna tungtawn in, Zosuante leh Meiteite kilemtak in teen khop ding ki utnawn kilkel nawnlo uh hi. Tua bek tham loin, Zosuante a minsiat theih theihna dingin ngawhna / mawhsakna leh simmawhna lian mahmah a, gamdang mi / khualmi ci-in nuaimang ding bek hanciam uh hi.
(3) Manipur kumpi, police, civil lam akipan Meitei thunuai ah om khin uh a, amau Meiteite lah deek vetlo in Zosuante nakpi takin ong do cuat ciat uhi.
(4) Thukhun kician om lo a, na khempeuh buaa mangkhin in, India kumpi in thuneihna la mai hen cih lunggulhna tangko taleh Biren makaih kumpi kiptak in ding lai, Meitei ten lah gum mah mah lai uhi. Hih thu hang mah mah in zong Zosuante adingin Meitei te tawh ki ukna khat nuaia om ding pen lamet bei kilkel suak hi.
(5) Meitei te in mulkimna bei-in a gamtatna uh hangin Zosuan tangval Tg. David Thiek (Hmar) a lu tansak in Biakinn kiang a gawl tungah suangin, a taksa sem nen dikdek in lampi tungah thehthang uh hi. Hih zah takin a gamtatna leh mihing a bawlsiatna khempeuhte uh Zosuan ten cik mah hunin kimangngilh ngeilo ding uh ahih manin, Meitei leh Zosuante pen kumpi ukna khat nuai ah om khawm thei ngei nawnlo ding uh hi.
(6) ZORO in Manipur a om Zosuante ukna gam laksak in, a nuaimang sawmna uh tawh kisai ahithei bangbang in panlak ding leh Manipur ki-ukna sung pan Zosuanten ki-ukna tuam a neih theihna ding uh, India kumpi tungah a ngetna pen ka thukimpih mahmah uh hi cih thu ZORO in pulak phapha hi hang. Leitung mun tuamtuam a om Zosuan ten tulaitak a Manipur state sung a om Zosuante galdona pen thukimpih in thapia tawntung ding uh hi cih ZORO in kiciantak i pulakkhia hi.
Hih namkal buaina tungtang ah Zosuan (Kuki-Zomi) te pen ZORO leh mun tuamtuam a om Zosua khempeuh in thapiakna leh panpihna a ngahnate thupi kisa mahmah uh hi. Mapang khawm peuh leng sepzawhloh ding bang mah omlo a, zong sem takpi ding hi hang. Topa’n Zosuante hong huh ciat ta hen.
By: ZORO Press Release
Posted: Tongsan Media Admin Team
Hits: 4