September 12, 2023 || Tongsan Media Group ||
Manipur sung a om Zo suante leh Meiteite kikal buaina tawh kisai India kumpi leh Manipur State government nangawn in minam deidanna leh gupna hangin a theilo kineih / awlmawh lo uh hi. Tua hang mah tawh tuni ciang dong Zo suante leh Meiteite kikal kido/ kikapna leh kithahnate nisim khauhpai semsem bek tham loin, a si liam akipan inn leh lo tampi kihaltum sakin khasiat huai mahmah dinmun ah tungta hi.
Hih thu tawh kisai Manipur, Mizoram, Myanmar (Chin State), leitung gam tuamtuam a kithehthang Zo suan / Zo mite’n kikhasiatpih in huhna leh panpih theihna lampi om bangbang in, kipanpih ciat hi. Tua bek tham loin, leitung kumpite leh biakna kipawlna (Christian Organization)te akipan UN nangawn in, lunghimawh in thu leh la tawh mapanpih laitak uh hi. Tuate’ sungah adiakdiak in Mizoram Chief Minister makaihna tawh abeisa nung Kha sungin Mizoram buppi ah lungphona (Demonstration) nasiatak nei uh a, leitungbup in kitheihpih hi.
Tua banah Mizoram Chief Minister Pu Zoramthanga makaihna mah tawh abeisa September 6, 2023 ni (9:00am) hun-in, Aizawl khuapi a om CYMA Hall ah Manipur state sung a om minam kee tuamtuamte ahi; Kuki Innpi, Hmar Innpui, KNO, PTC, UZO, STC, UPD, HPC (D), KNF, Zomi Steering Committee, Kuki Chief Association, Mizo People’s Convention, Manipur Tribal Forum cihte akipan kipawlna 22 pan makai 59, CSOs tuamtuam pan makai 40 kim leh MLA 7, banah Mizoram CM & Central Young Mizo Association (CYMA) teng kihelthei cih kiza hi.
Tua kimuhkhopna deihna bulpi pen Manipur sungah Meiteite’n Zo suan / Zo mite a nenniamna leh a bawlsiatna tawh kisai-in, minam kee min tuamtuam (Tribe names) teng mapankhop theihna ding leh kipumkhatna a thahat zawkna dingin, minam min kician (Common Tribes name) khat phuhkhiat ding deihna bulpi ahi hi.
Hih kipawlna minam min thak (Unified Organisation) dingin “ZO UNITED (or) ZO UNION” phuak ding khensatna nei uh ci hi. Hih Unified Organisation tawh kisai hong tung ding September 20, 2023 ma ngei-in, Pu Letpao Haokip makaihna nuai ah minam Innpite, Tribe Council, ITLF, COTU, HTC te’n Committee kiciankhat bawl khia dingin vaipuak kipia cih kiza hi.
Hih kimuhkhopna hun ah Mizoram Chief Minister Pu Zoramthanga in a genna ah, ” Meitei kal buaina pen major operation loin, kigualzo theilo ding hi. Tua banah nomenclature tawh buai loin kipumkhat in nakpi tak mapankhop ding akisapna gen hi. Tua banah Central government tungah Political Demand tawh kisai in, mipite thuzawh ( Consult) masa un la, Territorial Council maw (or) 6 schedule cihte tawh lungkim nai het kei un! Pangkhawm un! Mizoram in hong taisan lo ding ka hi uh hi “ ci-in pulakna nei hi.
Tua banah MNF Vice President Pu Vanlalzawma, Ex MP leh Tribes makaite, Ministers leh MLA pawl khatin zong thugenna nei ciat uh hi. Tua hi-in, hih Unified Organisation min thak ahi ” Zo United (or) Zo Union cih min khat tawh Zo mite, Zo suante, (Zo People), kipumkhatna leh mapankhopna a om theih ngeingei nading thungetna tawh mapanpih ciat ni.
Source: Indigenous Tribal Leader’s Forum (ITLF)
Hits: 10