Chin State tawh kigamgi Magwe Division, Saw khuapi ah CDF – Kanpalet, Zothau battalion ah ဒု-တပ်ရင်းမှူး (Deputy Commander) leh a pianna pa Christian Pastor sem laitakte pata Ukna buluh (SAC) pawlin November 7, 2023 ni zingsang lamin kaplum uh cih thu CDF – Kanpalet pan thuneite leh khuamite’n gen uh hi. Kanpalet township sungah galtai a om Christian Pastor U Mang Ki (Kum 52) pen Magwe Division ah galtai hi a, November 7, ni zingsang lamin Saw khuapi a om a meltheih khat tawh kiho kimlai mi mawkmawk puansilh (Uniform silhlo) thau tawi khat va pai-in, Pastor pa lutang kap cih thu khuamite’n gen uh hi.
” Hih Uniform silhlo Thautawi (SAC) te pen Pyusawhtee (Dalan) pawlin thupuak sim ahihna thu kiciantak kithei khia hi! Saw khuapi sungah SAC te a omloh laitak uh himah hi ven! Zanni Nov.6, in SAC pawl thakhat hong tungsuk vat uh hi lo hia! Amau ngimna (Target) omsa bangin ka (Bopa) uh ii pianna Pastor pa hong kaplum sak uh hi” ci-in CDF – Kanpalet pan thunei khatin genkhia hi. Tua banah SAC pawlin Pastor a kaplupna tawh kisai bel thuzakna / thungahna kiciantak a neih khitteh a kaplum uh hi ci-in, khuamite’n genbeh uh hi.
Pastor pa a kaplup laitak akim akiang a om khuamite zong kapphial mang lai uh a, ahi zongin kuamah khalo in taikek mang uh cih zong khuamiten gen hi. Pastor akaplup khit (minutes 6) kim ciangin Uniform silhlo pawl khat leh Uniform silh galkapte kigawm 20 val thakhat in hong suakkhia ngeingai uh a, a sisa Pastor pa pen kammal gilo tawh kosia gawp banah, misi luang a Khe uh tawh sui gawp lai uh ci hi. Tua bek tham loin, misi luanghawm pen Thau tawh kapbeh lai-in, cinbawl / ngak cip uh ci-in khuamite’n gen hi.
Tua laitak lianin Saw khuapi kiangah phualsat a om CDF-Kanpalet, Zothau battalion pan ဒု-တပ်ရင်းမှူး (Deputy Commander) zong ahi, misipa Pastor U Mang Ki ii tapa lah ahi U Ling Mang in apa sihna thu a zak phetin, Thau tawi lopi in va delh pah vingveng a, SAC galkapte’n na kap pah uh cih thu khuamite’n gen uh hi. Deputy Commander U Ling Mang pen a pumpi veiilam lungtang omna Thautang in kha in sipah lo ahih manin, taisuak in tawmvei sung kikem man lai hi. CDF – Kanpalet galkapte’n honkhiat dingin a hanciam uh hangin, lapzo nawnlo ahih manin, a sawtlo mahin a nuntakna bei ci hi. Tua banah Pastor luang pham ding apai khuamite leh CDF- Kanpalet galkapte zong SAC pawlin na kap gawp uh ci hi. Pastor ii luanghawm pen SAC pawlin amau galphual lamah pua in tawmvei sung kem uh a, nitak lam ciangin, Saw khua mite leh CDF- Kanpalet galkapte’ tungah misi luang piakhia kik uh cih khuamiten gen hi.
Hih thu piang hangin Saw khuapi ah khuamite leh galtaite lau in taikhia mang uh a, SAC pawlin honkhat man uh cih kiza hi. Galvai tawh kisai langnih kilimpan tuak mahmah uh ahih manin, hun ciangtan om loin kikapna nasia toto thei lai dingin khuamite’n gen hi. Chin State leitaw lam gamgi a om Magwe Division, Saw township ah PDF- Saw pawlin mun tawmpi mah ukcip zo ta uh a, Kongpi (gate) bawlin khualzin gamvakte leh adiakdiak in SAC galkapte ngimna tawh mipi sitcianna (Checking) nasiatak nei uh ci.in, khuamiten genbeh hi.
Pawlpi sia (Church Pastor) Pu Mang Ki tapa U Ling Mang pen Chinland Defense Force-Kanpetlet, Zothau battalion ah Deputy Commander hi-in, a naupa khat zong tua mun mahah galkap nautang khat mah ahi hi. “Hiam tawilo tualsung mi Pastor khat pen paulap / thubul omlo pi-in, hih bangin SAC pawlin kaplum ziauziau cih pen sangzo vetlo ka hih manun, nasiatak thukkik (Phula) hamtang ding hi ung! Bang hun, cik ni cih kigenthei nailo hi. Tua banah galvan tawi lo, ka makaipa (Bo pa) uh zong a pianna a pa luanghawm en ding a pai kim lai kaplum ziau uh cih thu pen kisangzo vetvet lo hi” ci-in, CDF-Kanpetlet Commander Salai Htun Ling Thang (ထွန်းလိန်ထန်) in genkhia hi.
CDF – Kanpalet, Zothau Battalion ah Deputy Commander U Ling Mang (Kum 25) leh a pianna pa Christian Pastor U Mang Ki (Kum 52) te’ pata luang hawm pen November 10, 2023 ni-in Kanpalet khuapi mun khatah Hankuang khat sungah kivui khawm cih kiza hi.
![](https://tongsan.org/wp-content/uploads/2023/11/399693393_827427552719633_2692069004815260271_n-769x1024.jpg)
![](https://tongsan.org/wp-content/uploads/2023/11/399391997_825822282880160_3371519903601367451_n-2-702x1024.jpg)
Hits: 1